Na entrada di e epoca di mayor actividad economico mundial
- Sector mundial di turismo ta prepara pa posibel shock mundial
- Dos escenario mas peligroso Siglo 20 ta uni na salida petroleo
ORANJESTAD (AAN)- ”Cu futuro no ta facil ta algo cu continuamente a wordo ilustra dor di e cadena di sucesonan. Aruba cu un economia cu ta depende di importacion y turismo mester prepara su mes pa resultadonan di e tension mundial serio cu lo por afecta comercio mundial den su totalidad pero sigur e sector vulnerabel di turismo.”
Durante Siglo 20, despues di dos guera mundial, tension internacional tabata concentra riba dos asunto, cu nucleo den e gueranan mundial.
E guera friu entre Rusia y Occidente cu menasa creciente di e bom nuclear y e confrontacionnan na Medio Oriente.
Na final di Siglo 20, a parce cu mundo lo a conoce mas acercamento y solucion pa problemanan. Un posicion mundial, den cual e miedo pa e resultadonan directo di un guera mundial nobo, tabata central.
Un solucion real pa e problemanan nunca a mira luz.
Na Siglo 21, realidadnan latente ta presenta nan mes na un mundo cu sigur telecomunicacion y comercio internacional a uni.
Na caminda pa futuro, 2025 a wordo considera e aña importante di transicion na un mundo cu basicamente no a conoce solucion pa e problemanan fundamental.
E pandemia Covid-19 a exigi tur atencion di mundo ora el a destrui economia establece y a acelera cambionan riba tur tereno.
Riba plataforma mundial, e Era di Inteligencia Artificial a percura pa mas comunicacion internacional pa gruponan di personanan cu mes ideologia y esaki ta haci cu e posibilidad pa union a pesar di distancia, a aumenta.
Siman pasa, atencion tabata dirigi atrobe riba e amenazanan di Rusia contra asistencia di Merca y mundo liber na Ukraine.
Intervencion di Rusia cu arma nuclear a wordo presenta na un forma directo y tabata tin atencion special na momento cu e grupo Hamas a ataca Israel.
Na 1967 Israel a ocupa e teritorionan na e parti occidental di e costa di e riu Jordan, caminda alrededor di 3 Miyon Palestino y mas cu 600 Mil colonista Israeli ta biba.
Pa mundo e desaroyonan ta tuma lugar na un zona cu ta centro di entre otro e Religionnan Hudio y Christian tambe.
Den e conflicto aki e acento religioso ta bini dilanti den un situacion mundial, cu pa basta tempo no a negocia pa paz.
Israel ta conta cu inversionnan grandi di su Pueblo, cu ta uno di e centronan mas grandi di procesamento di diamante na mundo. Sinembargo dilanti costa di Israel tin tambe reservanan grandi di gas.
E produccion di cuminda di Israel tambe ta hopi conoci na e pais, cu tin sosten economico fuerte na nivel mundial.
Pa basta dia tabata reina temor pa hostilidad na e frontera y fin di siman cu a pasa mundo a drenta un situacion di suspenso na momento cu fin di 2023 ta acerca.
Mientras e horor di perdida di bida den e totalidad di e guera tabata wordo transmiti, paisnan a cuminsa ta atende cu e resultadonan cu e tin pa nan tambe.
Kico e situacion actual lo por trece pa Aruba?
Informantenan ta mustra riba e hecho cu ya den pasado por a mira con un escalacion di un situacion den cual paz mundial ta na peliger, ta bira peliger tambe pa economia y sigur di pais manera Aruba cu ta depende di turismo.
Informantenan a indica ayera, cu rond mundo por mira con gruponan cu ta sostene e dos partidonan den e conflicto, ta subi caya den manifestacionnan.
Nacionnan Uni ta den deliberacion y mundo ta den un shock.
Mientras DIARIO ta sigui tur desaroyo, acento di informantenan ta wordo pone riba e resultado cu e confrontacionnan na Medio Oriente tin den cuadro di intrankilidad cu ta uni su mes ya na e tononan di guera y amenaza serio di Rusia.
Turismo na e momentonan ta den porta di high season, e temporada halto, pero tambe pendiente mescos cu importadornan di productonan basico pero tambe special pa e temporada di fiesta aki, ta pendiente.
Tension ta marca economia mundial cu tabata den estado di recuperacion ainda di Covid-19 y inflacion 2022 pa no papia mes di e problema di petroleo.
DIARIO lo sigui informa.
