Emotibo inauguracion di Plaza Madonna Stephens:
ORANJESTAD (AAN) – Presidente di SIMAR, señora Josephine Albertus, a hiba palabra en ocasion di e ceremonia di inauguracion di e plaza “Madonna Stephens” como tambe e develo di un plakkaat den su memoria.
E acto aki a tuma lugar den e sede di SIMAR, na Sabana Blanco, dedica na Madonna como un di e lidernan sindical cu tabata activo den e decada 1980, y pa e Josephine Albertus ta presente den e ceremonia aki tabata un honor.
Durante e ceremonia aki, famia di Madonna Stephens tabata presente. Josephine Albertus a bisa cu e no a conoce Madonna Stephens ni a traha cu ne, pero e por a compronde si cu e tabata un tremendo y gran maestro, lider sindical y Docente di Idioma Ingles.
Di famia di Madonna, el a scucha cu Madonna tabata hopi streng na scol, y cu el a duna hopi guia den e mundo sindical. Tambe den e mundo di enseñanza a forma parti di desaroyo y innovacion y cu di 1977 pa 1984 e tabata presidente di SIMAR.
Den e temporada aki el a haci hopi pa enseñanza y sindicalismo. Sindicalismo tin hopi aña y ta un honor pa sa cu tin lider sindical cu tin esaki na pecho y asina aki por a yuda den e desaroyo aki. Seguidamente Jose Fernandez Perna a relata mas di ken tabata Madonna, ya cu el a conoce di cerca.
Ophelia Beyden cu hunto cu Jillian Jones a devela e plaquette. Ophelia a expresa cu e ta contento di tabata eynan y cu nan a honra Madonna, un persona cu a duna alma y curpa pa SIMAR, y cu a kere fielmente den sindicalismo, husticia, honestidad, cambiamento di regla. E tabata hopi integro, y tabata manera un mama pa esnan mas jong y role model super streng pero nan opinion tabata conta, y si nan tabata tin derecho of tabata tin razon, e tabata respeta esaki. El a expresa cu e ta hopi contento cu despues di cinco aña e plenchi Madonna a bira realidad.
Finalmente Jillian Jones, cu ta di e generacion mas chikito di e famia di SIMAR, y aunke e no a experiencia e tempo cu, manera nan a bisa, nan tabata biba den SIMAR (24/7), e ta corda cu ora e tabata tin mester di Madonna tabata yame na SIMAR.
Pa nan tur Madonna tabata un mentor y un guia, semper dispuesto pa duna un conseho sea chikito of grandi. Pa Jillian ta un honor di tabata na SIMAR pa e acto di develo bunita aki.
{gallery}Madonna Stephens tabata un mentor, guia y consehero pa e generacion di maestro mas hoben{/gallery}
