Luigi Wix hopi orguyoso di celebra prome aniversario di Radisson Blu Aruba

Hunto cu su team dinamico y unda nan ta awo:

ORANJESTAD (AAN) – Den entrevista cu DIARIO, señor Luigi Wix, Manager General di Radisson Blu Aruba, a splica cu e hotel ta celebrando su prome aniversario di operacion.

Wix a expresa cu esaki tabata un aña hopi largo, di hopi reto. El a subraya cu habri un hotel riba su mes ta hopi dificil.

“Habri un hotel na Aruba ta dificil; habri un hotel na Aruba den un pandemia ta hopi dificil. Pero mi ta hopi orguyoso pasobra nos tin un team hopi fuerte; nos ta e unico brand hotel cu tin un team completamente local, y esey ta algo cu ningun otro hotel por bisa”, Luigi Wix a enfatiza.

El a reitera cu nan a haya nan mes den hopi diferente reto, pero nan tey aworaki y esaki ta e momento pa bisa cu e pandemia ta den pasado, y pone tur cos all out y wak unda e hotel ta bayendo.

El a remarca cu e marca di Blu aki ta algo unico na Aruba, algo completamente diferente, e ta un concepto di hotel tipo boutique, pero riba un nivel halto. E aña aki ta uno unda nan a siña hopi riba diferente nivel. El a reitera cu e ta hopi orguyoso di su team, y unda nan ta awo.