Logo nobo relaciona cu 25 aña di seguro AZV

Organo Ehecutivo AZV:

ORANJESTAD (AAN): Diahuebs anochi, meymey di invitadonan y partnernan di sector di cuido di Aruba, di Colombia y e famia di Organo Ehecutivo AZV (OE AZV), Prome Minister Mike Eman, Minister Mervin Wyatt-Ras y director di OE AZV a desvela e logo cu durante 2026, OE AZV lo uza relaciona cu 25 aña di existencia di nos seguro AZV.

   Dia 1 di januari 2001, Gobierno di Aruba a introduci e seguro di AZV, seguro di cobertura universal. Na 2026 e seguro di AZV ta cumpli 25 aña y OE AZV no ta bay laga e momento aki pasa sin pone e atencion debido na esaki. Como prome evento relaciona cu e 25 aña di AZV, un anochi special a keda organiza. Aki ta unda a desvela e logo “aniversario”, esta e logo cu unicamente den 2026 lo keda uza. E anochi di desvelo a cuminsa cu director di AZV repasando e tres metanan principal pa cual a dicidi di introduci AZV.

   Den su presentacion, director di AZV ta conclui cu tur partner den cuido, por ta satisfecho cu nan trabao den conhunto den e 25 añanan di AZV. Di e forma ey awe por bisa cu Aruba ta hopi cerca di cumpli cu un cuido accesibel pa tur, di bon calidad y cu ta pagabel y efectivo. Esaki ta keda un proceso cu continuamente mester evalua. Tambe mester keda atende cu e retonan pa keda yega na e metanan.

   Minister di Salubridad Siguientemente Minister encarga cu salud publico, drs. Mervin Wyatt-Ras a enfatisa e importancia di nos seguro AZV pa nos comunidad. El a expresa un gratitud inmenso pa henter sector medico y e team completo di OE AZV parando keto na e importancia di cada uno dentro di e cadena di cuido medico. Minister Wyatt-Ras a segura esnan presente cu e tin e compromiso cu Aruba pa sigui percura pa un AZV sostenibel y cu ta sigui sirbi nos pueblo. Na mes momento, el a conclui informando cu actualmente su ministerio ta deliberando con por pone extra atencion na e aspectonan di prevencion y revalidacion.

   Presentacion di Prome Minister Ultimo orador di e anochi tabata nos Prome Minister mr. Mike Eman. Prome Minister Eman a repasa un rato e momentonan di tension y resistencia pa cu e introduccion di AZV. El a para keto na e accionnan e tempo aya, tanto for di sector cuido pero tambe di companianan di seguro, purbando na crea panico y duda den comunidad.

   Den e proceso final pa e introduccion di AZV, Prome Minister Eman a reconoce e trabao di e Minister di Salud di e tempo ey, esta señor dr. Ike Posner como tambe e guia riguroso di e Prome Minister di e tempo ey, esta señor mr. Henny Eman. Prome Minister Eman a conta cu Prome Minister Henny Eman tabata reuni cada dos siman cu tur e stakeholdersnan den gobierno pa monitorea y garantisa cu e proceso di implementacion di AZV ta cana den e bon direccion. Y den esaki, Prome Minister Eman a mustra cu drs. Anco Ringeling, director di AZV e tempo ey, tabata instrumental den e proceso y tabata e man drechi y man robes di Prome Minister Henny Eman. Pa termina, Prome Minister Eman a enfatisa con importante AZV tabata y ta pa continuidad di maneho. Y a sorprende tur presente cu e anuncio cu Gobierno di Aruba a dicidi pa confia OE AZV cu ehecucion di e ley di cuido a largo plazo cu ta na caminda pa keda introduci na 2027.

   Un noticia cu a cay den masha bon tera cerca e stakeholdernan di cuido cu tabata presente. Reconocemento y gradicimento Un momento extra special, tabata ora cu Minister President Eman y Minister Wyatt-Ras a entrega señor drs. Anco Ringeling (ex director) un reconocemento special mirando e trayectoria largo y incansabel cu drs. Anco Ringeling tabata tin pa cu seguro AZV. Prome cu a cera e anochi, OE AZV a pasa tambe na gradici y entrega un bunita regaldo na e ex directornan cu tabata presente; esta señor drs. Ru Croes, señor Alwin Lin y señor Ruben Goedhoop.

   Finalmente a pasa pa desvelo di e logo relaciona cu 25 aña di existencia di AZV. Den e dianan nos dilanti OE AZV lo ta informando comunidad di e calendario di actividadnan cu lo organiza den 2026 pa para keto na e hecho memorabel aki. OE AZV ta celebra, conmemora y gradici tur su aseguradonan.