ORANJESTAD (AAN): Durante e proceso di entregamento di e lista di e partidonan politico diabierna a surgi algun cuestionamento relaciona cu e hecho si e procedura di partido RAIZ di entrega
nan lista den forma digital (via email) tabata uno valido.
Relaciona cu e asunto aki, Glenn Thode, Presidente di Conseho Electoral a indica cu em berdad, Partido Raiz a entrega na prome instante nan lista via email, esta den forma digital.
Thode a indica tambe cu si ta check den e 'Kiesverordening' y den ley no tin prohibicion pa manda algo via email locual ta haci valido e forma con RAIZ a presenta su lista di candidatonan.
Por a tuma nota atardi cu e lider di RAIZ, Ursell Arends toch a presenta den persona y Conseho Electoral ta considera esaki un aparicion valido cu ta esaki ta pa asegura cu tur cos ta na ordo, Thode a remarca.
Den e caso di partido RAIZ, parce cu e ponencia ta cu tabata tin algun menasa den nan direccion y banda di esaki tumando na consideracion e tema di e pandemia, pesey a dicidi di presenta nan lista den forma digital.
Sharin Luydens, Directora di Registro Civil y Censo a expresa cu "ley nunca por ta un instrumento di obstruccion desfavorable pa salubridad publico".
El a indica cu pa 12:05 pm, RAIZ a entrega e lista digitalmente. E proceso tabata legal y nan ta para tras di esaki, Luydens a enfatisa.
