Mike como Prome Ministro no tabata sa kico ta pasa den Gobierno?
*Kico ta e mensahe cu Mike Eman kier manda pa Husticia y mundo?
*Sector priva ta tene un sospechoso den un caso criminal na trabou?
ORANJESTAD (AAN) — Kico ta e mensahe cu Mike Eman kier manda pa Husticia na Aruba y pa henter mundo?
Esaki ta e pregunta cu mester bini dilanti si analisa loke ta pasa actualmente na Aruba, cu scenario di un investigacion penal riba posibel otorgamento di tereno dor di un miembro dor di gobierno anterior di Mike Eman.
No ta awor e investigacion ta andando y pa basta tempo ta conoci, cu Benny Sevinger por haya su mes ta aparece dilanti Huez.
Pa Aruba e caso aki ta sumamente importante, pasobra si e investigacionnan termina cu condena di Benny Sevinger, esaki ta causa e pregunta con por tabata posibel cu tur esaki a pasa bou nanishi di Mike Eman y e no tabata sa nada.
E investigacion ta cuminsa cu entrada di Gobierno di Mike Eman y ta termina cu salida di Mike Eman cu manera e mes ta bisa tabata for di inicio “lomba contra lomba” cu Benny Sevinger riba listanan di candidato.
Ora nos mira kico Ley ta bisa di e situacion actual, nos por mira e realidad cu si Benny Sevinger mester tabata un candidato pa Ministro e lo a wordo gscrap for di e lista den screening como sospechoso den un caso penal, cu otro palabra caso criminal.
Ya cu ley di screening no ta conta pa Parlamento, Benny Sevinger por ta den Parlamento.
Pero awor kico ley di moralidad, di decencia y integridad ta bisa? Nos por papia den mundo di politica di integridad si un persona cu autoridad ta sospecha di algo castigabel, ta mustra cu e no ta retira?
Si esaki ta e caso kico nos mester haci cu ciudadanonan cu ta perde nan trabou si nan ta sospechoso den un caso caminda detencionnan ta cay?
Aruba Diahuebs tabata spera e momento cu AVP lo presenta su lista di candidato pa mira kico e partido a dicidi pa loke ta trata Benny Sevinger. Anteriormente ya e Ex Ministro di Husticia y ex Presidente di Parlamento Eddy Croes a mustra cu un sospechoso no por ta den Parlamento.
Esaki ta nifica, cu Benny Sevinger mester a retira for di su puesto basta tempo.
Grandi tabata e sorpresa ora casi na inicio di toque de queda Mike Eman a presenta e lista di candidato di AVP, cu Benny Sevinger como number 29, pa colmo lamentando cu semper nan tabata lomba contra lomba riba lista pero e biaha aki no.
Kico Mike Eman kier a bisa mundo y Reino? Kico Mike Eman kier bisa votadonan cu den rapportnan manera di “Bo Aruba” ta mira con hunto Mike Eman y Benny Sevinger tabata atende cu proyectonan manera ayera DIARIO a trece dilanti?
Kico ta e mensahe cu Mike Eman ta manda pa Ministerio Publico? Bofon e kier haci di nos sistema legal?
Pakico cueste loke cueste Benny Sevinger mester tabata riba lista? Kico ta lista di norma y balor di Mike Eman den gobernacion y den Parlamento?
Segun normanan di Reino y di mundo liber, sigur di Aruba como pais decente, Benny Sevinger como sospechoso di Husticia no por representa e Arubiano y no por ta den Parlamento.
Pero Mike Eman tin otro opinion y Benny ta riba lista di e partido berde, cu awe mester duna Pueblo di Aruba un splicacion pasobra ta cara di Pueblo di Aruba a wordo pone na berguensa.
