Localnan tambe por disfruta di vuelonan di British Airways

Pasashi ida y vuelta ta como 1.100 Florin

ORANJESTAD (AAN): E ta un gran logro!  Riba cara di tur funcionario di Aeropuerto, di Direccion di Turismo, di periodista-, y tambe demas staf di Aeropuerto y demas stakeholder den mundo di aviacion, por a mira e sonrisa grandi!

   Despues di hopi aña di intento, negociacion, y sigur perseverancia, e momento a yega cu Aruba a haya vuelo directo for di Reino Uni cu servicio regular di British Airways.

   Jo-Anne Arends kende ta Air Service Development Manager di AAA NV, riba Diahuebs atardi ora cu a anuncia esaki oficialmente den VIP Room di Aeropuerto, a bisa cu e anuncio aki tabata hopi emocional pe, y sigur pa hopi otro persona cu tabata envolvi den e negociacionnan.

   Exactamente riba Diadomingo 26 di Maart 2023, Aruba lo bay duna un bon bini masha caluroso mes na e personal y pasaheronan abordo di e Boeing 777-200ER, cu lo yega cu servicio bi-semanal for di London Gatwick.  E avion aki ta carga 336 pasahero.  London Gatwick Airport (LGW) ta un aeropuerto internacional grandi situa como 47 km pazuid di London central. LGW a maneha 6.9 miyon pasahero na aña 2021 y prome cu Covid a maneha riba 46 miyon.

   Negociacion di diez aña: Aruba lo ta e prome destinacion den Caribe Hulandes cu ta adkiri servicio di British Airways.  Esaki ta un logro grandi pa un isla manera Aruba.  British Airways ta un aerolinea global cu ta existi pa mas cu 100 aña y nan ta opera un di e flotanan mas grandi y moderno di cualkier aerolinea na mundo.  E islanan den Caribe unda British Airways tin vuelo regular ta Antigua, Bahamas, Bermuda, Barbados, Cayman Islands, Republica Dominicana, Grenada, St. Kitts, St. Lucia y Trinidad & Tobago.

   Pa prome biaha den historia, Aruba lo bay tin un vuelo regular pa henter aña pa Reino Uni.  Un logro asina grandi den mundo di aviacion y turismono ta pasa di un dia pa otro.

   Jo-Anne Arends a divulga cu a tuma mas cu 10 aña di negociacion pa por a convence British Airways pa reconsidera y pone Aruba riba su ‘shortlist’ pa wordo inclui como destinacion regular.

   Na 2015, Aruba Tourism Authority hunto cu Triple A NV a forma un team pa asina bishita e sede principal di British Airways na London pa comparti e strategia pa diversifica, expande, y desaroya conexionnan pa asina atrae mas turista, y asina engrandece e mercado di Europa.

   Algo fenomenal ta cu por usa nan vuelo pa asina conecta pa centenares di otro vuelo rond mundo, y esaki ta un situacion positivo pa e viaheronan.

   E vuelo nobo di British Airways pa Aruba lo ta Diahuebs y Diadomingo.  E lo sali pa 10’or di mainta for di London Gatwick, y yega isla di Antigua pa 1:35 pm.  Lo haci un stop di 60 minuut, y despues sali y yega Aruba pa 4:30 pm.   E  vuelo di regreso lo sali 6:30 pm bek pa London (pasando atrobe na Antigua), y lo yega e siguiente mainta 10:15 am na Gatwick.

   Segun Arends, ya caba por book pasashi riba e website di British Airways, y aki por a nota cu ya caba tin tarifa di vuelo di Aruba pa London ida y vuelta cu ta cuminza na 1.100 Florin.