ORANJESTAD (AAN) – Un ciudadano a trece dilanti un opinion interesante, tocante e vacunacion contra Covid-19, y esaki tin di haber cu e gruponan segun edad y vulnerabilidad.
E ta haya cu na henter mundo, y tambe na Aruba, nan mester a cuminza vacuna, alomenos esnan den edad di 18 te 30 aña na prome lugar, pasobra nan a, y ta sigui mustra, cu nan ta e grupo cu a plama e virus unda hopi hende di edad di 60 bay ariba mester a wordo hospitaliza, bay den cuido intensivo, y hasta haya ventilacion mecanico cu tur su consecuencianan, uncluyendo morto.
Si analiza e opinion publico aki, e tin hopi sentido y logica, y podise hopi mas hende lo a pensa asina tambe. Si sikiera un porcentahe considerable di hobennan lo a wordo vacuna prome, como cu nan ta esnan cu no kier laga fiesta para, no por keda cas, ta nenga uza tapaboca y ta drenta den bar ta bebe hunto cu amigonan, muy posiblemente hopi menos hende grandi lo a muri sin cu por a logra vacuna.
Awo, ta wordo constata cu na henter mundo e casonan di Covid-19 a aumenta drasticamente y asina tambe e cantidad di mortonan mientras cu e edadnan ta mas abao. Na Colombia e prome mucha cu Covid-19 a fayece, lamentablemente. Y tin indicacion cu tin un ciudad a wordo poni full den cuarentena y na lock down total. Noticianan similar por observa for di Merca. Y tur e contagio aki causa pa esnan mas jong. Asina ta, cu enberdad e opinion publico menciona, ta algo di pone atencion na dje.
