ORANJESTAD (AAN): Diasabra atardi laat, 13 hoben bunita di Aruba a worde instals como candidata official di Miss Youth Aruba 2021. Nan lo bay tin un trayectoria di mas o memos 3 luna, caminda e candidatanan lo ricibi hopi
seminarionan educativo, protocol, pasarela, sesion di potret, fundays y mucho mas.
E tema di e certamen pa e aña aki pa Miss Youth 2021 ta "Viva La Fiesta" celebrando nan di 5 aña di certamen, esta e prome lustro y nan ta dedica e certamen e aña aki na Aruba su frontliners, tur nos hereonan cu ta trahando duro pa cu e pandemia di Covid-19.
E certamen final mes lo bay ta dia 3 di Juli den Renaissance Convention Center, cu lo ta un anochi estilo Las Vegas yena cu pluma, briyo, fashion. runway, glamour y hopi sorpresa mas.
Diasabra anochi ademas di instala candidatanan, ya caba organizadornan a duna premio pa candidatanan cu ya caba a sobresali den cierto aspecto.
Riba e potret aki por mira d.r.p.d. Stacey van Gaalen (San Nicolas) cu a haya premio di ‘Personalidad’. Banda di dje por mira Mayrien Correa (Tanki Leendert) cu a haya e premio di ‘Autentico’.
E siguiente ta Ruchelline Zievinger (Paradera) cu ya a gana e premio di ‘Popular’ y tambe premio di ‘Carisma’.
Por mira Kayla Villasmil (Oranjestad) kende a gana e premio di ‘Glamour’. Sigui pa Abigail Sanchez (Noord) cu a gana premio ‘Confianza’.
E siguiente ta Xanthe Piña (Dakota) kende a gana premio di ‘Actitud’. Finalmente tin Kelsey Westerburger (Districto 11) kende a gana e premio di ‘Integral’.
Masha pabien, y di awor caba exito na tur candidata. Na pagina 24 por mira potret di e candidatanan pa 2021.
