Minister di Infrastructura Rene Herdé:
ORANJESTAD (AAN): “Algo cu mi no kier wak nunca mas pa nos careteranan, ta e lapimento cu tabatin pa hopi tempo. Pasobra den bista di pueblo, esaki ta gastamento di placa. Y e placa cu nos tin, nos lo percura pa invirtie miho posibel”, asina Minister di Infrastructura Rene Herdé a enfatisa durante un entrevista recien cu DIARIO.
Minister Herdé a duna di conoce cu despues di destaho manera ley ta prescribi y cu yega na acuerdonan cu companianan di asfalt, por cuminsa pa asfalta careteranan. Segun e, esaki por cuminsa dentro di dos siman. El a menciona cu Departamento di Obra Publico (DOW) tin plan pa haci un sorto di investigacion, un analisis di sistema y tiponan di asfalt.
Den un bishita recien na un scol tecnico pa infrastructura na Hulanda, e mandatario a menciona cu el a descubri cu tin 25 tipo di asfalt pa tur tipo di suela, temperatura, clima entre otro. El a duna di conoce cu lo uza e conocemento aki hunto cu e gran experiencia di DOW y e dos companianan di asfalt na Aruba, pa asina inverti e placa cu recientemente a wordo aproba den e presupuesto di infrastructura, wordo inverti miho posibel.
E titular di infrastructura a enfatisa cu no kier wak lapimento mas cu asfalt. Simplemente yena buraco cu asfalt pa despues awa yobe, bolbe crea buraco, no por pasa mas. Mas bien, el a menciona cu por uza e material cu a wordo uza pa Green Corridor y Watty Vos Boulevard, cu tabata di bon calidad y tur analisis cu DOW a haci, a raporta cu e dos camindanan den bon estado ta e dos camindanan aki.
Ademas di e bon calidad di asfalt, e mandatario a remarca cu un otro factor pa cua e camindanan aki ta den bon estado, ta e mantencion preventivo regular di esakinan. E mandatario a menciona cu tur plan cu tin pa asfalta nos careteranan, lo wordo ehecuta a largo plaso manera ta e caso di e dos careteranan aki. “Asina so nos por demostra cu camindanan cu nos traha ta keda den bon calidad tambe”, el a enfatisa.
