Lo honra memoria di Tino Ruiz cu busto na rotonde di Noord

ORANJESTAD (AAN): Diamars mainta den un reunion ameno, Minister di Husticia y Asuntonan Social Sr. Rocco Tjon a haya un presentacion cortico di artista reconoci, Sr. Gilbert Senchi,

di su trayectoria como artista como tambe tur e piesanan di arte cu e a traha pa diferente causa na Aruba y rond mundo.

Sr. Gilbert Senchi ta e artista cu a keda encarga pa traha e busto di ex colega y miembro honorabel di Cuerpo Policial di Aruba Sr. Tino Ruiz.

Na aña 2017 Sr. Tino Ruiz a perde su bida eherciendo su trabou, un trabou unda cu e la huramenta pa traha cu alma y cuerpo pa pais Aruba, cual e la haci sigur.

Pa e motibo ey, lo honra Sr. Tino Ruiz como un baluarte di Cuerpo Polis di Aruba. E proyecto aki lo tin un duracion di mas o menos cuatro luna y lo wordo poni na rotonde di Noord, banda di Misa Santa Ana.