Leynan local y internacional ta prohibi pa mishi of causa daño na e turtuga of su webonan

Dia Internacional di Turtuga di lama:

ORANJESTAD (AAN):   Fundacion Turtuga Aruba a publica riba nan Facebook Page cu diahuebs ultimo na Eagle Beach por a tuma nota di un cantidad di turtuga baby cu a broei sali for di nan neishi y cu a inicia nan aventura di bida den lama grandi. Na mesun momento a mira un cantidad grandi di hende cu a aglomera pa saca nan potret.

            For di un articulo cu Directie Natuur en Milieu a publica aña pasa y cuadro di Dia Internacional di Turtuga di lama mester recorda cu leynan local y internacional ta prohibi pa mishi of causa daño na e turtuga of su webonan, pa cual DNM ta urgi comunidad pa ora observa turtuga riba beach, pa no yega cerca y stroba e proceso di broei.

            DNM a urgi comunidad pa respeta e recursonan natural y e bida marino. Fundacion TurtugAruba ta e autoridad cu ta monitor turtuganan di lama ora nan subi beach pa pone webo y ta recomenda pa yama nan mesora na 592 9393 si topa cu turtuga riba tera pa broei. 

DNM tambe ta duna algun sugerencia pa usuarionan di lama:

- Ora di snorkel of duik, tene un distancia y keda leu di e turtuganan di lama. No mishi cu nan. Tampoco duna nada di come;

- mantene nos beachnan limpi di sushedad, hiba tur desperdicio cas y no laga esaki riba beach.

- tapa tur buraco cu ta coba den santo blanco pa recreacion y laga e santo plat pa facilita turtuganan cu lo uza e sitio pa broei;

- no uza luz riba of banda di lama anochi, mirando cu e turtuganan di lama ta sensitivo na luz artificial, esaki por causa cu ta desvia e turtuga di su proposito.

            Den caso cu nota cu tin hende cu no ta mantene nan mes na e leynan en cuestion, por fabor contacta polis. Hunto nos por yuda conserva nos naturalesa pa e genereacion cu ta bini y respeta nos biodiversidad.