Señora Michella Croes di Fundacion Zinnia:
ORANJESTAD (AAN): Ta un statisfaccion grandi, cu despues di morto tragico di Zinnia Croes, su legado ta keda pa semper den un ley cu ta carga su nomber, Zinnia Croes. E ley ta bisa cu una bes un persona causa un accidente, e mester keda na e sitio. Y si e bandona e sitio di accidente, e ta castigabel y e lo haya dos aña di castigo extra. Asina mama di Zinnia señora Michella Croes di Fundacion Zinnia a expresa den un entrevista cu DIARIO. Fundacion Zinnia ta existi pa 11 aña caba y ta organiza diferente campaña pa conscientisa ciudadanonan di e consecuencianan di maneha auto bou di influencia di alcohol.
Den e temporada hopi activo aki, ta trece memorianan tristo pa famia di Zinnia y otro famianan cu a perde sernan stima. Ya durante e prome dianan di e prome luna di aña, hopi accidente a tuma luga y mayoria tin di haber cu uzo di alcohol mientras ta maneha den trafico. Esaki tambe tabata e caso, na unda di Zinnia Croes a fayece door di un chauffeur bou influencia di alcohol.
E ley aki, lo keda pa semper como un mensahe pa tur chauffeur, cu si nan comete un acto asina, lo tin dos aña extra di castigo y tambe e ley ta keda como un satisfaccion y legado, segun su mama Michella, cu Zinnia su nomber y cara ta carga un ley y cu esaki, su morto no mag di ta envano y hende nunca lo lubida.
Señora Croes a remarca cu e fundacion lo ta activamente den Carnaval un biaha mas y lo tin diferente control cu Cuerpo Policial. Nan lo ta cu nan campaña Supla pa Bida y lo parti breathalyzer gratis den paradanan, haciendo apelacion na esnan cu a bebe alcohol, pa haci e test prome cu nan tuma e disicion pa bay stuur.
Tambe por tuma contacto cu Fundacion Zinnia pa busca un breathalyzer gratis via nan pagina di Facebook na unda por obtene tur informacion necesario.
