ORANJESTAD (AAN): Manera ta conoci, den siglo pasa e Freres de la Salle a lanta y duna enseñanza na diferente scol di mucha homber na Aruba.
Diferente di e grandinan masculino ta recorda diferente experiencia di e añanan aki. Cerca nan tambe ta conoci e cantidad di tempo cu e Freres a inverti na e guia y formación di nos hobennan pafor di oranan di scol.
Nan tabata e fundador di diferente club di deporte cu te ainda ta existi y ta activo. Tambe riba tereno cultural nan tabata activo. Hopi di nos ta recorda e añanan glorioso di “De Trupialen” cu bao di guia di Frere Alexius a entretene grandi y chiquito cu nan canto y teatro.
For di comienso di 1937 te cu Mei 2000, Freres de la Salle a forma parti di nos comunidad Arubiano y nan herencia y impacto tabata grandi. Sinembargo mientras e añan ta progresando e recuerdo y impacto di e Freres ta bira vago den nos memoria. For di punto di bista historico e ta bal pa mantene den nos memoria, nan trabao incondicional sin propio interes den nos comunidad. Nan ta merece un lugar di honor riba nos isla.
Na januari 2025 un grupo di persona cu un sentimiento nostalgico y di gratitud a lanta cu e idea pa conserva e memoria di nan impacto incondicional pa futuro y a lanta Grupo di Proyecto Freres de la Salle. Grupo di Proyecto Freres de la Salle a dicidi pa realisa un proyecto consistiendo di tres parti esta construccion di un monumento; publicacion di un buki di conmemoracion y produci un documentario di nan trabao na Aruba.
Pa realisa esaki ta puntra e cooperacion y participacion di ex-alumnonan. E intencion ta pa realisa tur e tres subproyectonan ariba menciona pa 2027, e aña cu lo e ta 90 aña pasa cu e prome Frere a yega Aruba. Pa e realisacion di e proyecto aki obviamente lo mester placa. E suma presupuesta ta 495.000 Florin.
E grupo di Proyecto actualmente ta aserca diferente organisacion y comercio pa Stichting Huize De La Salle Projectgroep Pro Frères de la Salle.
Account: Nan cuenta di banco Aruba Bank: #7628100190. E ta na nomber di Stichting Huize De La Salle. Nan KvK-nummer: S12.0 37050, y adres ta Primavera 1-B. Nan Email: This email address is being protected from spambots. You need JavaScript enabled to view it.
Esaki ta pa yuda nan recauda fondo pa cubri e gastonan di realisacion. Pero debi cu ta considera e proyecto aki como un expresion di gratitud pa tur locual e Freres de la Salle a haci pa Aruba ta pidi e comunidad Arubiano pa tambe contribui na e gastonan pa asina realisa e proyecto conmemorativo bunita. Nan ta conta cu Bo contribucion generoso riba nan cuenta di banco na Aruba Bank.
