Otmar Oduber
ORANJESTAD (AAN): Un ley cu lo a contribui pa haci Serlimar independiente y para riba su propio pia, te dia di awe, casi 6 aña despues, ta den su segunda tanda den Parlamento di Aruba y ta parse cu no kier termina e tratamento aki, Otmar Oduber a declara durante e programa ‘Nos Realidad’ cu por wordo segui live via Facebook page di Nos Pais, Power FM of Diario TV.
E ley aki ta significa dos diferencia grandi pa Serlimar. 1. Nan lo por para riba nan propio pia. Mescos cu cualkier parti mundo desaroya, tur hende lo tin e obligacion di paga pa e sushi cu nan ta produci na Aruba. Esaki no kiermen cu mester bay paga sumanan halto, e tempo ey a acorda hasta cu gremionan sindical cu a firma un document bayendo di acuerdo cu e suma di Afl. 27,50 pa cada cas. Loke e ley lo a haci ta cu Serlimar lo por a saca aanmanning pa nan por cobra.
2. Crea e oportunidad pa tin un incinerator na Aruba manera tur rapport ta indica, cu ta e unico solucion cu por tin pa desperdicio na nos isla.
Durante e tratamento di e ley den Parlamento a bin dilanti bisando cu por bay cu e opcion di exporta sushi, pero esaki Otmar cu e tempo ey tabata minister, a indica cu no lo funciona, pasobra paisnan lo prohibi importacion di sushi, y ‘dicho y hecho’ esaki a sosode. “E tempo aya a hunga wega den Parlamento.
Un parlamentario cu tabata sostene gobierno a bula afo, no kier a haya presion, no kier a vota pa e ley aki y ora mester a vota, un otro parlamentario a bisa cu si su ley di cannabis no pasa, e no lo firma pa ningun ley di Serlimar pasa, pasobra bo tin cu ‘cani mi pa mi cani bo’. E politica ey mester caba! Lamentablemente nos ta mira cu e la sosode 7 aña pasa, e la sosode 5 aña pasa y e ta sosodiendo awe atrobe”, ta palabranan di Oduber.
Agregando na esaki, e ta bisa cu esey ta e motibo pa cual Plataforma Nos Pais a bin, pa traha hunto, pasobra tin beneficio ora ta traha hunto, independiente si ta gremio comercial, sindical, organisacion politico of no. Ta importante pa papia cla riba e realidad cu tin na Aruba.
