ORANJESTAD (AAN): Den un entrevista cu Mediador Anselmo Pontilius el a revela algun dato importante. El a splica cu den e caso di Sindicato FTA, por ehempel, nan a cambia nan statuutnan interno
den nan congreso. Esaki ta nifica cu un trahador individual por bira miembro di e sindicato.
El a laga sa cu den e caso aki, e dunador di trabao lo por bisa cu e ta acepta cu e trahador ta miembro di un sindicato, pero no ta bay tin obligacion pa coopera pa kita su contribucion cu ta paga mensualmente via banco.
E doño di trabao por acepta cu e sindicato por bin represent'e, pero e sindicato no lo tin autoridad pa negocia condicionnan di trabao.
A remarca cu e ley di referendum cu tin na Aruba ta hopi anticua. Ta data di aña 1972 bin padilanti. E companianan cu e sindicatonan ta bisa cu si 20% of 10%, por ehempel, di e trahadornan scoge pa bira miembro den un forma organisa, nan ta respet'e y nan ta bay negocia e condicionnan di trabao.
Pontilius a sigui bisa cu e pregunta ta si 10 of 20 porciento ta representativo. Aworaki e ley di referendum ta papia di 50 + 1 y esey ta trece su dificultadnan cu ne. E cambio den ley ta hopi importante, a expresa.
Ta den un proceso pa e departamento di Mediador tin un formacion hinca den otro di tal forma cu por percura tambe pa atende cu cambionan di ley, cual lo bira mas realistico pa e temponan cu ta bibando.
Si aworaki un grupo di hende solicita pa un oficina di abogado representa nan derechonan na trabao, pero ningun caminda ta estableci cu e oficina di abogado por negocia e condicionnan di trabao colectivo pa e trahadornan.
Ta regla den ley cu e sindicato lo mester obtene mas cu 50 + 1 via esnan cu derecho di voto. E ta hopi burocratico y ta limita e posibilidad ey. Importante ta si logra haya cu e dunador di trabao cu e sindicato acepta y bay mesa pa negocia e condicionnan di trabao, Pontilius a declara.
