Ley di Plan di Mayor ta un logro mas na bienestar di nos muchanan

Parlamentario Marco Berlis (MEP):

ORANJESTAD (AAN):  Diabierna 1 di maart Ley di Plan di Mayor ta drenta na vigor. Kico e ley aki ta? Esaki ta un ley cu ta enfoca riba e bienestar di e mucha ora cu mayornan ta den divorcio. Meymey di discusion poco biaha ta para keto riba kico e yiunan ta desea unabes cu su mayornan no ta hunto mas.

            P’esey, e plan di mayor ta percura pa prome cu e mayornan divorcia oficialmente, tin un plan por escrito unda ta indica con mayornan ta bay comparti nan responsabilidad pa cu e yiu(nan).

            Di e forma aki por mira con Gabinete Wever-Croes hunto cu coalicion den parlamento ta keda traha na bienestar di nos muchanan y ta pone nan siguridad y desaroyo central. Nos no por lubida e logronan cu parlamento tawata tin pa cu e meta aki:

1. A Cambia e Ley pa subi e castigo maximo pa esnan cu ta abusa di mucha. Na juni 2020 a pasa e ley den parlamento, pa subi e castigo maximo pa abusadornan sexual di mucha. Treciendo e cambio riba e ley aki, ta duna OM e autoridad pa por exigi mas castigo y ta brinda e Hues espacio pa condena esnan culpabel pa un castigo mas largo. A logra haci esaki den apenas 3 aña di gobernacion di Gabinete Wever-Croes-I. 

2. Family Justice Center. Esaki ta un Proyecto di Gobierno cual tin como meta pa atende cu casonan di abuso sexual di mucha. Un di e problemanan mas grandi pa por cera e abusadornan ta cu mester di e pruebanan di e acto. FJC tin diferente profesionalnan manera un psicologo, un recherche, docter y rapekit disponibel pa acumula tur prueba necesario y trata e mucha afecta mesora. E instancia aki ta brinda e ayudo special aki na nos comunidad den casonan lamentabel aki. 

3. Ley di Ombudsman y Kinderombudsman a keda aproba pa coalicion den Parlamento. Den januari 2023 e ley pa establece y busca e Ombudsman, na mei 2023 e profielschets di e ombudsman a keda finalisa y na September 2023 a habri e vacatura oficial pa Ombudsman y KinderOmbudsman. Pueblo di Aruba por nota con cu echonan nos ta logra pa nos ciudadanonan haya nan defensor. E Defensor di Mucha lo tin tur recurso na su disposicion pa haci investigacionnan profundo, cooperacion di tur departamento di gobierno, e lo tin e autoridad hasta pa investiga tur caminda y hasta den gobierno. Esaki ta un logro hopi grandi pa nos pais y sigur pa nos ciudadanonan. Di e forma aki nos muchanan lo tin nan propio defensor cu lo por atende casonan di un forma hopi riguroso y profundo. 

            Agregando e logro di Plan di Mayor na e lista nos por mira cu gobierno y Parlamento den coalicion ta keda pone nos muchanan y nan siguridad como prioridad. No laga niun hende desinforma bo of gaña bo pa rasonnan politico cu no ta asina. Nos muchanan ta keda central y un prioridad pa cada un di nos y esey hamas lo cambia.