Evitando cosnan manera na e creche bay ripiti
ORANJESTAD (AAN): Diaranson mainta, durante conferencia di prensa di Gobierno di Aruba, minister di Husticia y Asuntonan Social sr. Rocco Tjon conhuntamente cu señora Sue-Ann Ras di Departamento di Mucha y Hoben (DMH), a elabora riba e ley di kinderopvang. Esaki, den cuadro di e videonan di e creche cu a lek riba plataformanan social, pa loke ta un incidente na un creche specifico. Minister Tjon a sigura cu Gobierno di Aruba y su persona ta condena e actonan aki rotundamente. Pa e motibo aki, Gobierno di Aruba ta inverti hopi pa combati abuso di mucha en general.
Recientemente, a sinta den parlamento hunto cu e comision di husticia y asuntonan social, caminda a elabora hunto cu tur e profesionalnan kico tur ta e pasonan cu a worde tuma. Un paso hopi significante, cu ta toca specificamente e incidente cu a tuma luga, ta pa percura cu e ley cu ta regula e parti di kinderopvang y creche, worde trata den parlamento y worde aproba, banda di esey a introduci Departamento di Mucha y Hoben. Remarkabel ta, cu hopi di esnan cu a pidi pa actua aworaki, tabata contra e introduccion di e ley aki, pues awo ta wak e necesidad di esaki.
E ley aki ta sumamente importante pa eleva siguridad di nos muchanan, mirando cu e ley aki ta toca tur e diferente critera cu un creche mester atene su mes na dje, e parti infrastructural, di higiena, e parti pedagogico, pero tambe e parti di cuanto leidster mester tin den un creche pa tanto mucha cu nan ta acomoda. Pues e ley ta conta cu diferente faceta.
DMH por guia mayornan tambe di con nan por scoge un creche, nan tin e registro y nan sa kico ta e puntonan cu mayornan mester tena cuenta cune, na momento cu nan scoge un creche, y DMH tin un rol pa brinda e informacion aki y asina guia e mayornan, pues di e banda aki, e mensahe ta bay pa tur esnan cu tin un mucha na un creche, si tin mester di informacion y guia pa haci e escogencia, semper por acudi na DMH pa cu esaki.
Minister Tjon ta haci un yamada na tur persona cu tin informacion cu a nota of señala algo cu no ta bay bon na un creche, pa meld esaki mesora na DMH, y pasonan lo worde tuma. Ora e incidente actual a worde gemeld, teniendo na cuenta e ley, regla y procedura, a actua mesora.
E parti di supervision ta den ehecucion, DMH actualmente ta chikito ainda, pero lo sigui fortifica e departamento aki cu mas personal den e añanan nos dilanti. Tin un plan extenso cu DMH a traha den colaboracion cu Cuerpo Policial y diferente reunion a ruma luga, specificamente cu Polis di Bario, y nan ta asisti DMH den ehecuta e diferente control nan.
Por ultimo, e ta importante pa splica cu a base di e ley di kinderopvang, a introduci un “verguningstelsel”. Antes no tabata existi un permiso pa creche, pa cual motibo actualmente no tin un permiso cu por worde revoca. E ley ta hopi cla, pues pa revoca un permiso, esey ta e “ultimum remedium”, pues e ultimo paso, prome cu yega na e ultimo paso, e instancia mester ricibi varios “boet”, y si ta trata di peliger di inmediato, e permiso por worde revoca.
Tur cos mester ta den balansa, pues si ta trata di algo infrastructural, por sera e creche pa e worde drecha, si ta toca leidsters y a worde deteni, esey kiermen cu no tin un peliger inmediato mas. E ley ta dicta cu mester tin un “intrekkingsbeleid”, cual ta trahando riba dje, den colaboracion cu Directie Wetgeving en Juridische Zaken (DWJZ).
