ORANJESTAD (AAN): Crecemento den servicio di Centro di Cuido di Mucha a conduci cu for di 1998 Parlamento di Aruba a aproba un iniciativa di ley pa regula y salvaguardia e cuido y calidad pa muchanan dentro di un centro di cuido di mucha.
Gabinete Wever Croes I a pone e implementacion di e ley aki como un prioridad halto riba nan agenda y semper tabata interesa y involucra den e proceso di e trabaonan. Gabinete Wever-Croes II a continua cu e trabaonan necesario cual a conduci cu awe, Minister di Husticia y Asuntonan Social Sr. Rocco Tjon, a anuncia e ehecucion di e ley di centro di cuido di mucha como tambe a oficialisa e Departamento di Mucha y Hoben, exitosamente.
Na aña 2020 a inicia cu e proceso pa analisa prome kico tur tin caba na Aruba, y wak con por compensa loke falta. Cierto aspectonan ta keda e responsabilidad di e Gobierno di un pais y esey Gobierno di Aruba a asumi tambe. Departamento di Mucha y Hoben tin como un di su tarea- y metanan principal pa duna un caracter sostenibel y duradero na tur e derechonan internacional di mucha y hoben, manera ta ancra den e Decretonan di Derechonan Internacional di Mucha, cu Aruba ta forma parti di dje tambe for di 2001. Banda di esaki, Departamento di Mucha y Hoben (DMH) ta traha tambe riba e parti di administracion y registracion nacional y ta otorga permisonan na e centronan di cuido, ta ehecuta e supervision y control riba cumplimento di e condicionnan y e servicionan, manera ta stipula den e ley.
Minister Tjon expresa cu e ta sumamente orguyoso cu a logra yega asina leu, unda cu tanto e cambionan riba e ley di 2017 ta haci, y tambe ta conta cu e cuater LB-hamnan y e dos ministeriële regeling necesario, cual ta completamente cla, pa por ehecuta e ley di centro di cuido di mucha. Banda di esaki, Departamento di Mucha y Hoben tambe ta oficial. E proceso digital di aplica pa un permiso temporario a inicia, a base di e manual di regulacion, cu ya caba a keda presenta na henter e veld aña pasa.
Asina ta cuminsa traha riba un base mucho mas solido y duradero, unda hunto nos ta percura pa nos muchanan por ta den un ambiente mas sigur y cu ta brinda nan e espacio y guia necesario pa nan por desaroya optimalmente. Esaki ta un sistema digital, pa di un forma mas eficiente y eficaz, yega na e datonan y registracion nacional di e centronan di cuido. No tin duda cu un centro di cuido di mucha ta sumamente importante den desaroyo di un pais, ya cu nan ta aporta na un bon comienso pa e muchanan, tanto den nan carera escolar como ciudadano di e sociedad aki, di cual nan tambe ta forma parti di dje.
Importante pa menciona si ta cu, na ningun momento e ta e intencion pa sera un centro di cuido di mucha, pero mas bien, brinda e sosten y guia necesario pa cumpli cu e exigencianan minimo pa asina garantisa y salvaguardia e bienestar general, salud, proteccion y desaroyo optimal di nos muchanan.
Por ultimo, e mandatario a gradici tur esnan presente pa tur e añanan di trabao y dedicacion na nos muchanan y tambe un pabien grandi na Departamento di Mucha y Hoben, y na Aruba cu despues di 17 concepto di ley y despues di 24 aña nos ta logra inicia e comienso nobo aki.
