ORANJESTAD (AAN) – Tisa LaSorte, CEO di Tourism Association (AHATA), den entrevista cu DIARIO a manifesta e preocupacion grandi cu nan tin, cu e problema di RWZI Bubali Plas, y no ta scucha nada tocante
un plan na corto plazo pa soluciona e situacion.
LaSorte a menciona cu awa sushi ta saliendo caba y ta bay lama, cu e peligro cu e por contamina nos beachnan y esaki por resulta desastroso pa Aruba su economia y nos mes salud.
El a comenta cu AHATA a sugeri y aconseha pa privatiza e planta, y e ta apoya e plan aki completamente, pasobra esey ta asegura no solamente inversion den e planta mes, pero ta keda mantene e planta mes.
Tisa LaSorte a indica cu e motibo di e problema actual ta cu e Bubali Plas ta un planta cu tin 50 aña bieu cu no ta wordo manteni na e manera apropia, y pesey e no tin e capacidad di procesa tur e awa cu ta drenta.
“Pero, enberdad e proceso pa yega na e momento cu tin un planta nobo, cu a wordo privatiza, cu a cambia ley y cu e ta cla pa opera, ta bay tarda algun aña. Anto, nos pregunta ta, ki bo ta haciendo mientras tanto”, señora LaSorte a señala.
El a agrega cu mester tin un plan, pero ainda e no a tende un anuncio, sino cu e tin algun informacion cu el a haya den combersacionnan priva, pero AHATA kier pa conforma kico gobierno ta bay haci cu e planta, mientras tanto e planta cu tin actualmente por procesa e volumen di awa sushi cu ta drentando den e planta, y esaki ta algo sumamente urgente.
