Inicio di dianan di fiesta ta dilanti porta cu celebracion Thanksgiving
*Mester actua awor contra vehiculonan cu ta terorismo riba caretera
*Mester deshaci di atentado contra bida, peso financiero y economia
ORANJESTAD(AAN)—Dianan di fiesta 2023 ta acercando na Aruba, cu ta prepara su mes pa e temporada cu mester produci gozo y alegria na un momento di hopi tension mundial.
Thanksgiving ta acerca y na un parti grandi di mundo, sigur e mercado turistico mas grandi di Aruba cu ta Merca, ta marca e entrada pa dianan di fiesta di fin di aña.
Mientras ya e situacion mundial ta causa un peso pa costo di bida, mayoria di comunidad a cuminsa planea pa e temporada cu lo trece alegria pero tambe sosten economico y financiero pa e pais.
Factornan cu ta bay contra loke ta wordo considera e pakete total di alegria di dianan di fiesta mester wordo elimina y pa publico esaki sigur ta seguridad pa hende, loke na prome lugar ta encera bienestar fisico di hende cu ta wordo amenaza na un forma serio pa comportacion di hende den trafico.
Manera informantenan cu DIARIO a acerca den profundisacion di e tema di awe ta trece dilanti, comportacion di publico den trafico por pone bida di hende den peligro pero tambe ta amenaza e peso financiero di comunidad cu mester paga pa e resultadonan mescos cu economia y asina entrada di ciudadanonan ta worde afecta.
“Peligro den trafico ta un atentado directo contra un comunidad riba tur tereno y mester atende cu loke ta produci problema serio,”informantenan ta indica.
Den e serie di problema aki sigur mester pone automobilistanan cu ta ekipa nan vehiculo na forma cu ta bira peligroso pa comunidad.
E chens pa un accidente den trafico conoce mas victima den condicionnan mas serio ta aumenta hunto cu situacionnan cu ta provoca peliger pa hende.
E tamaño di tyrenan cu ta wordo uza actualmente ta contra midinan normal y ta sumamente peligroso den accidentenan, cu ta causa mas problema pa hende y otro vehiculo riba caminda.
Alcohol den trafico ta peligroso, pero hopi peligroso ta tambe tur e artefactonan cu awor a bira moderno manera luz sumamente fuerte, cu ta wordo instala na un forma cu no ta di acuerdo cu areglonan oficial.
Luznan cu ta afecta bista di hende, ta wordo instala na un forma cu nan ta stroba otro chofernan y ta asina ta haci cu otro hende ta bira victima di conducta irresponsabel.
No mucho tempo pasa, autoridad a mustra riba e resultadonan cu uzo di glas getint tin den trafico.
Uzo di luznan grandi ta resulta tambe den e hecho cu e glasnan di vehiculonan cu ta participa den trafico ta mucho scur y ta haci cu luz mas grandi ta wordo uza loke ta pone bida di otro hende na peliger.
Segun informantenan prome cu dianan di fiesta yega, mester cuminsa atende cu e problema aki.
Ciudadanonan ta basa nan mes na loke a bini dilanti den Corte di Husticia, caminda e persecucion di personanan cu ta causa accidente fatal, mester responde pa nan actonan cruel.
Ministerio Publico lo ta trahando riba un ley pa personanan cu ocasiona un accidente den un vehiculo cu glas getint.
Ta sali na cla cu e glasnan ta wordo haci mas scur despues cu keur e vehiculonan y asina haya aprobacion pa participa na trafico.
Informantenan a mustra cu nan ta spera cu e ley necesario pa atende cu e problemanan grandi cu glasnan scur di vehiculo ta ocasiona, wordo atende mas pronto posibel.
Si prome cu fin di 2023 ya ta conoci kico ta spera, ta evita mas vehiculo cu glas getint riba caretera y asina ta evita mas accidente cu resultado serio pa hende y comunidad.
E gastonan enorme cu abuso den trafico ta nifica pa comunidad por wordo uza pa alivia otro pesonan di ciudadanonan den temponan dificil. Mas cu esey, problemanan social serio ta wordo produci pa victimanan.
DIARIO ta den contacto cu informantenan pa haya un impresion cuanto tempo lo mester spera ainda riba e ley, cu mester proteha comunidad di abuso di glas getint.
Actuacion di autoridad riba e tereno aki tambe mester habri porta pa atende cu mas abuso den trafico dor di personanan cu ta haci uzo di equipo y instalacionnan na nan vehiculo cu ta aumenta peliger den trafico.
Informantenan ta expresa e speransa cu 2024 lo trece solucion cu lo a evita dolor den tanto hogar na Aruba na 2023.
Economia di Aruba ta depende di un trafico sigur, manera nan a mustra cu enfasis riba turismo y e forma cu seguridad den trafico tin un impacto riba actividadnan pafor di cas.
