Lider di FTA Hose Figaroa:
ORANJESTAD (AAN) – Den entrevista cu Hose Figaroa, Presidente di e Federacion di Trahadornan di Aruba (FTA), el a elabora tocante e tema di Arbowet, cu tin mas cu cinco aña den plan, pero no a wordo cristalisa ainda.
“Arbowet ta algo cu constantemente ta keda bin dilanti, y den cierto sentido nos a splica cu Arbowet ta un proceso, e no ta algo cu ta di awo. No ta algo nobo, pero mester tene na cuenta tambe cu Arbowet no ta sin mas ta wordo implementa. Nos sugerencia na gobierno tabata pa cuminsa un implementacion den fase, poco poco”, lider di FTA a comenta.
El a agrega cu Arbowet ta yen di regla cu mas tanto tin di haber na pia di trabao, con tin cu acopla e espacionan unda hende ta traha, pero na momento di bin cu e regla aki esey kiermen cu ta bay tin cierto gastonan tambe, cu ta bay bin cune.
“Esey no ta un gasto cu ta bin pa e trahado directamente. E ta bin pa e empresa. Pero experiencia ta cu hopi biaha e ta cuminsa na algo cu ta bay na e empresa, pero poco, poco e dunador di trabao ta ‘sluit’ door di e trahado. Por ehemplo, e empresa ta bisa cu e kier a aumenta salario pero e tin hopi gasto door di Arbowet”, Lider di FTA a comenta.
Figaroa a expresa cu Arbowet mester wordo introduci pero mester cuminsa un caminda, pasobra e stap aki no tin fin di yega. “Mester realiza si, cu Arbo ta un proceso cu ta tuma su tempo, pasobra si no, ta bira un carga financiero hopi grandi. “Por ehemplo, ley ta bisa cu bo mester haci tur bo stoelnan economico. Anto, si mi tin un empresa unda 50 hende ta traha, tin cu cambia 50 stoel pa stoelnan economico. Pero cada stoel ta cuesta 3 mil of 4 mil florin. Si bo coi un calculator bo por sa ki gasto ta esey”, Hose Figaroa a relata.
El a reitera cu esaki ta un proceso cu mester implementa den fase p’e no bira un peso financiero demasiado grandi, di biaha. Pero di otro banda tin cu cuminsa un caminda. “Y manera mi a menciona, nos ta cinco aña leu y te ainda nos no a ni cuminza cu e prome parti di implementacion di e ley aki.
