ORANJESTAD (AAN): E homber P. (35) a apela su castigo di 4 aña di prison di cual 6 luna ta condicional.
Dia 4 di Februari 2022, Hues di Corte den Promer Instancia a dicta sentencia caminda Hues ta haya P. culpable di a abusa di un mucha homber (15) riba 31 di Mei 2021.
EXIGENCIA DI FISCAL
Tratamento di e caso aki a sosode na Januari 2022 caminda Fiscal a bisa Hues cu tin suficiente prueba di sosten. E sospechoso a declara na Polis cu el a bay na e cas y a drenta paden pasobra segun e sospechoso, e mucha tabata kier pa e conoce su wela. Segun e sospechoso, e mucha a bisa cu su wela lo no bay pafor. E mucha a declara cu su wela tabata drumi. E wela a confirma tambe cu e tabata drumi. E sospechoso ta bisa cu el a bay sinta den auto pa papia cu e mucha. E mucha ta bisa cu P. a haci actonan inmoral cu ne den auto. Fiscal ta remarca pakico P. ta bay den auto cu e mucha siendo e ta bisa cu e kier papia cu e wela. Na dado momento e omo di e victima a yega y e victima a spanta y bira nervioso. E victima kier a bay paden pero P. a bis’e pa laga e omo bay paden y despues e mucha ta bay paden.
Fiscal a mustra cu tin video di seguridad na e cas cu ta mustra cu P. tabata 4 minuut den e cas y mas o menos 6 minuut su so cu e mucha den auto. Por mira cu ora P. a sali for di e cas, e tabata subiendo su carson. Na opinion di Fiscal, tur esakinan ta mustra loke e mucha ta bisa cu P. a haci actonan inmoral cun’e y a purba penetr’e.
E sospechoso ta conoci como coach di futbol cu ta traha cu muchanan. Su trabao ta pa yuda y salba guardia muchanan pa sigui studia. Fiscal ta haya cu P. no a haci su trabao sino a sigui su gana.
Fiscal no ta haya cu P. por sigui haci e trabou aki mas. El a exigi 4 aña di prison di cual 6 luna ta condicional cu un tempo di prueba di 3 aña. Esaki cu e condicion cu P. ta cay bou guia di Reclassering. Tambe Fiscal a exigi pa prohibi P. pa haci su trabao te caminda ley ta permiti.
SENTENCIA
Dia 4 Februari 2022 Hues a bisa cu ta un hecho cu e mucha homber di 15 aña y P.(35) tabata hunto. P. tabata den cas serca e mucha.
Hues a bisa cu tin indicacion cu P. via social media ta persigui muchanan pa abusa di nan. A haya den cellular di P. potret di mucha menor di edad y e mucha a bisa Polis cu P. ta un maniac. Tin un otro mucha cu a bisa cu P. a ofrece placa pa abusa di dje.
Na opinion di Hues, mirando cu esakinan ta cuadra cu loke e victima a pasa aden, e ta haya cu tin suficiente prueba di sosten. Tambe Hues a mustra cu tin declaracion di e wela cu ta biba na e cas, e mucha, imagennan di video di seguridad na e cas.
Pa cu e castigo, Hues a bisa cu e ta tene cuenta cu e seriedad di e caso. Actonan inmoral ta tacha integridad di un mucha. Esaki por afecta e mucha pa hopi tempo. Hues a confirma e exigencia di Fiscal. El a condena P. na 4 aña di prison di cual 6 luna ta condicional cu un tempo di prueba di 2 aña. Esaki bou guia di Reclassering. Hues no a menciona nada cu ta prohibi P. di sigui haci su trabou.
ACUSADO A APELA
Ta asina cu despues di e sentencia, e acusado y Fiscal tin un periodo di 2 siman pa evalua si ta apela e sentencia.
Informacion cu DIARIO ta dispone di dje ta mustra cu P. a apela e sentencia. Esey ta nifica cu awor Hof di Corte Superior lo bay trata e caso. Tres Hues di Antiyas lo bin Aruba pa trata e caso aki y finalmente dicidi si e castigo ta na su lugar of no.
