Cuminsando juli 2024, LATAM Airlines lo opera 4 vuelo pa siman
ORANJESTAD (AAN): AUA Airport y Aruba Tourism Authority (A.T.A.) tin e placer di anuncia e
decision di LATAM Airlines di aumenta e frecuencia den su servicio directo di mas recien esta
Lima y Aruba (LIM-AUA). E aumento aki ta demostra un paso significativo den fortalece e
conexion entre e dos destinacionnan emocionante aki, atendiendo e demanda creciente di
biahe di y pa Aruba.
Cuminsando desde e prome trimester di aña 2024, specificamente den luna di juli, LATAM
Airlines lo aumenta su vuelonan LIM-AUA for di tres vuelo pa siman pa cuater vuelo pa siman,
introduciendo un servicio adicional riba dialuna, agrega na e vuelonan actual di diahuebs,
diasabra y diadomingo. E decision pa amplia e servicionan a bin debi na e demanda creciente
di biahe pa cu e ruta LIM-AUA y claro, debi na e exito di e oferta actual di LATAM.
E aumento di frecuencia tin como meta pa brinda e pasaheronan mas flexibilidad y opcion na
momento cu nan ta planea nan biahe no unicamente entre Lima y Aruba sino tambe pa e otro
destinacionnan solicita den Sur America atendi pa LATAM, incluyendo Argentina, Brasil, Chile,
Paraguay y Uruguay. E distribucion actual di trafico den e vuelonan di Lima ta indica cu Peru ta
sigui ta e shareholder mas grandi di e mercado cu un 40%, sigui pa Chile cu 30%, Argentina cu
25% y Brasil cu 5%.
“Nos ta masha orguyoso di e compromiso den forma di aumento di e cantidad di vuelonan LIM-
AUA di LATAM Airlines. Como meta principal di nos aeropuerto, nos ta dedica pa mantene
conexion strategico y garantisa e sostenibilidad a largo plaso di e ruta aki. Esaki ta pone enfasis
riba e compromiso di Aruba pa establece nos posicion como un di e islanan Caribense
altamente conecta”, asina Jo-Anne Meaux-Arends, Aviation Business Development Executive,
a bisa awe cu un sonrisa di satisfaccion riba su cara.
“Apenas seis siman despues di e vuelo inaugural di LATAM Airlines, nos tin e placer di anuncia
incorporacion di un di cuater vuelo for di Lima pa Aruba, respondiendo na e demanda
importante observa den Sur America”, di acuerdo cu Ronella Croes, CEO di Aruba Tourism
Authority (ATA), a comenta.
E logro aki ta pone enfasis riba e campañanan di mercadeo y promocion haci tanto pa A.T.A. y
nos socionan di Aruba. Desde meymey di aña 2023, A.T.A. hunto cu demas socionan di Aruba, a
ehecuta varios iniciativa di benta, programa di conscientisacion y esfuerso pa genera demanda.
E resultado positivo ta demostra e compromiso colectivo pa mehora e conexion y promove
Aruba como un destinacion di preferencia. Cu bista riba futuro, A.T.A. lo sigui enfoca riba nan
compromiso pa amplia presencia di Aruba den e mercadonan di “Cono Sur” di Sur America
como parti di e strategia di diversificacion. “Nos tin planea pa ehecuta diferente accion
innovativo di mercadeo y posicionamento di destinacion dirigi na segmentonan di balor halto
den diferente ciudad clave manera Santiago de Chile, Buenos Aires y Sao Paulo”, segun
Ronella Croes a splica.
