Interupcion di coriente a causa presion di awa abou
*A dura 2 ora y mey pa por recupera coriente na e diferente barionan
ORANJESTAD (AAN): Diahuebs atardi, for di 5'or, varios bario na Aruba a keda sin coriente.
For di diferente districto a cuminsa raporta cu no tabata tin coriente y esaki a causa un paro casi total di e actividadnan comercial y laboral rond di Aruba.
WEB Aruba NV y ELMAR NV un rato despues a duna e prome informenan di e situacion y a indica cu a surgi un fayo den plantanan di WEB Aruba cual a causa interupcion di coriente na entre otro barionan di Playa un parti, hotelnan, Santa Cruz, Savaneta, Pos Chikito, Paradera un parti y San Nicolas. Den e caso aki a papia di un 'large brown-out'.
Siguientemente un resumen cu a keda emiti relaciona cu e status di e situacion di tanto coriente como awa, cu a keda reestableci totalmente pa 7:33 pm:
UPDATE 7:33 PM Suministro di coriente pa ELMAR y nos isla ta 100% recupera.
UPDATE 7:31 PM: Suministro di awa ta completamente recupera.
UPDATE 7:23 PM Area di San Nicolas ta hayando coriente gradualmente, entre otro Imsan lo haya coriente awor.
UPDATE 7:19 PM Areanan di Balashi y Parkietenbos a haya coriente. Lo sigui cu areanan di Santa Cruz, Savaneta, Pos Chikito. Entretanto a recupera pa gran parti e presion y suministro di awa pa e areanan afecta.
UPDATE 7:13 PM A logra reestablece coriente pa e sistema di verpomping y awor lo bay pa pone esakinan den servicio pa lanta presion di awa den e areanan afecta.
UPDATE 7:07 PM Entretanto a conclui riba e causa di e 'brown out'. Algun minuut despues di 5:00 PM, diahuebs 28 di december, a surgi un cortocircuito den un di e transformadornan den planta di WEB, cual a conduci na interupcion di coriente pa diferente area di nos isla. Debi na e fayo aki e sistema di pompnan cu ta pomp awa pa Aruba a perde coriente tambe y consecuentemente a paga y presion di awa a cay pa varios parti di Aruba.
Personal di WEB ta recuperando e coriente pa e pompnan aki pa por start esakinan atrobe. Mientrastanto ta bezig ta reestableciendo coriente na e partinan afecta hunto cu personal di Elmar na e Substationnan rond Aruba. E proceso aki mester bay hopi controla pa e planta no cay atrobe, paso ta e situacion ta delicado.
UPDATE 6:52 PM Area di Palm Beach, Noord a recupera coriente.
UPDATE 6:30 PM Gerencia a dicidi di pospone e celebracion cual tawatin planea pa empleadonan di WEB diahuebs nochi. A pidi comprension di empleadonan y a enfoca pa sigui cu recuperacion di suministro di coriente.
UPDATE: 6:18 A inicia suministro di coriente bek pa Area di hotel y pa Hospital!
UPDATE 6:15 PM Lo dura mas o menos 2 pa 3 ora pa por recupera coriente na e diferente barionan cu a keda sin coriente.
UPDATE 6:02 PM e interupcion di coriente a causa presion di awa abou. Esaki tin nos atencion pa nos remedia esaki mas pronto posibel.
Pa loke ta WEB Aruba NV a ofrece disculpa pa e inconveniencia causa pa e 'brown out' di diahuebs atardi, entre 5 pm y 7:30 pm. "Nos ta hopi consciente cu un interupcion di coriente y/of awa no ta agradabel y ni conveniente.
Nos empleadonan di departamentonan di produccion di coriente y awa, pero tambe esnan di sectornan di mantencion, di asuntonan tecnico, di distribucion di awa y departamento di comunicacion, tur a haci nan maximo esfuerso pa a limita e tempo di 'brown out' mas tanto posibel y pa mantene nos comunidad informa. Un biaha mas nos gradicimento pa e comprension y pasenshi".
