Den entrevista cu Rubin Ponson
*16 di e aña aki y 2 di aña pasa
ORANJESTAD (AAN) — Den entrevista cu señor Rubin Ponson, miembro di e Comision di vuurwerk na DOW, el a comenta pa DIARIO cu manera ley ta stipula, dia 27 tabata e dia cu a saca klapchinan for di WELA pa wordo distribui entre e comerciantenan concerni, y cu por a cuminza bende nan tambe.
Esaki a sosode exactamente na cuminzamento di dia 27, esta pa 12 or di anochi e containernan a cuminza sali riba caya, y durante henter e oranan di marduga a saca tur e containernan for di WELA y pa net 7’ or di mainta a saca e ultimo container y tur a wordo reparti na e puntonan di benta, pa e controlnan cuminza tuma lugar door di diferente departamento.
Ponson a confirma cu tabata tin cuater container riba barco cu no tabata pa yega Aruba e aña aki, pa motibo cu e permisonan cu a wordo pidi pa importacion tabata e cantidad ey, di cual un tabata vuurwerk pa show cu ta bay yega pa cuminzamento di 2024.
Ponson a subraya cu esaki no ta problema pasobra ta vuurwerk cu nan ta uza durante henter e aña. Tambe e otronan tres tabata pa yega na cuminzamento di aña, pero cu hopi esfuerzo e importadornan a logra toch pa pone riba barco y nan lo a yega e ora ey durante Diahuebs, di atardi pa anochi; e departamentonan ta prepara prome cu yega pa asina cuminza haci e tramitenan pa nan bay WELA pa djey pone e containernan riba caya pa e benta.
Rubin Ponson a agrega cu e puntonan di benta no a aumenta, pero e average ta casi mescos cu tur aña, segun’e hasta un tiki mas abao. Cierto distrito por ta, a subi un tiki mas y otro a baha, pero e cantidad semper e ultimo añanan a draai rond di sesenta punto di benta.
El a agrega cu ultimo añanan e controlnan ta bayendo hopi facil, pasobra mayoria ta hendenan cu ta bende pa hopi aña caba, nan sa di e reglanan y di e riesgonan cu si e lugar no ta cumpli tin consecuencia.
Awo nan tur sa con nan tin cu mantene nan lugar, cual ta e reglanan y por lo general e ta bayendo hopi bon.
Rubin Ponson a indica tambe cu como dos container cu klapchi a resta di aña pasa, y por conta nan riba e 16 container cu tin di e aña aki cu ta suma na un cantidad di mas of menos 18 container.
