Lanzamento di buki ‘From Victim to Victor’ na Biblioteca Nacional

Autora Faridi Abdul-Hamid

ORANJESTAD (AAN) Diaranzon atardi, Faridi Abdul-Hamid, a presenta, na e cantina di Biblioteca Nacional, su buki “From Victim to Victor”. Na un manera sublime, Rubina Bernadina, a haci e introduccion tocante ken e autor ta, cual meta tin tras di e buki aki, y kico e ta nifica pa e autor di a duna e stap aki.

   Tabata tin como invitadonan, funcionarionan cu ta dirigi instancianan cu ta atende cu casonan di abuso sexual di mucha, y otro asuntonan social, manera Departamento di Asunto Social, Fundacion Respetami, entre otro invitadonan interesa den e tema, manera “Toast Master” y Parlamentario Eduard Pieters  na cualnan el a duna nan un ehemplar, y logicamente, directora Astrid Britten di BNA a haya un ehemplar.

   Den su introduccion Rubina a indica cu Faridi a nace na Curacao, y na 1990 el a bin biba na Aruba, un transicion cu a forma su bida y su identidad di un forma masha profundo.

   Faridi a splica cu “From Victim to Victor” (Di victima pa Vencedo), ta un historia di bida real, cu a kibra su curazon. Un hobencita cu for di su 9 pa 15 aña a bira victima di abuso sexual, un experiencia cu a laga den dje un marca profundo y silencioso, cu  pa tempo largo el a carga un dolor cu e no tabata sa con pa expresa. E meta di e buki ta pa inspira, yuda y compaña otro hende den nan mesun proceso, pa esnan cu nan voz a keda silencioso, cu ta carga un historia dificil, y esnan cu mester ripara cu nan no ta nan so.

Na final tabata tin oportunidad pa haci pregunta na e autor, y por mira cu esnan presente a keda satisfecho y conmovi.

   Despues, como ciere, a ofrece algun pasaboca y un brindis sin alcohol, pa celebra e buki, y e forza y curashi con el a wordo presenta.

   Faridi a keda hopi gradici cu tanto Biblioteca Nacional cu a dune espacio pa presenta su buki, y e instancianan presente y otro invitadonan pa nan support y bon comentarionan.  E potretnan pa cortesia di Rubina Bernadina.