Landsrecherche no a acepta denuncia di Otmar Oduber y OM a pidie pa e entrega esaki por escrito

ORANJESTAD (AAN): Diaranzon ex parlamentario y minister Otmar Oduber a presenta na Landsrecherche,

pa entrega un denuncia, despues cu el a sinti cu pa 4 aña largo el a wordo maltrata y difama, pa loke ta e caso cu ta wordo yama ‘Flamingo’.

Oduber a splica cu el a bay Landsrecherche pa entrega un denuncia di falsificacion y gaña bao di huramentacion, contra dos funcionario publico, esta un ambtenaar di Landsrecherche y un ambtenaar di Cuerpo Policial, specificamente di e departamento BCI, cu ta Bureau Criminele Intelligentie.

“E denuncia ta tambe contra Recherche Samenwerkinsteam (RST), pasobra mescos cu e funcionarionan di Landrecherche y polis, RST a traha procesverbalnan falso”, segun Oduber, kenda indica cu Dialuna dia 24 di April lo entama otro caso contra Ministerio Publico, caminda cu lo pidi huez pa forza nan pa tuma un decision riba kico nan ta bay haci.

“Hibami corte pa mi defende mi mes, of declara mi liber di tur acusacion”, pasobra esey ta e realidad y esey lo ta husto na e momentonan aki, despues di 4 aña di investigacion”.

E siman aki Huez Comisario a pidi fiscal un reaccion riba e demanda cu mi a haci y den nan reaccion nan ta bisa cu nan tin mester di mas tempo, pasobra den nan concepto nan a apunta den nan documento cu tin 3 motibo pakico nan ta kere cu nan mester evalua ainda si ta bay dunami un citacion, of dunami un ‘kennisgeving van niet vervolging’, segun Oduber.

El a splica cu tur acusacion cu nan tabata tin anteriormente y un declaracion di RST cu tabata totalmente falso, a wordo laga afo di e puntonan cu nan kier uza pa hibe corte.

Segun e ex mandatario, e ta kere cu mester por pone hende responsabel pa e hecho cu nan a afecta grandemente bida di un hende, unda cu a daña tambe nomber di e ciudadano.

Ora cu Oduber a bay entrega e denuncia na Landsrecherche, eynan nan a informe cu e tin cu haci esaki na OM.

Na OM Oduber a indica cu nan no a acepta su denuncia y pesey el a bisa cu e tipo di cosnan aki ta ponebo pensa unda nos estado di derecho ta.

“Landsrecherche ta bisa nos cu nos no por entrega un denuncia eynan, caminda cu facilmente nan lo por a haya sa e berdad”.

Bo ta wordo manda pa Landsrecherche pa bay entrega e denuncia na Procurador General y e vocero di OM a ricibi nos y a bisa nos cu PG a pidi pa manda e denuncia por escrito, segun Oduber.

El a puntra e vocero ken ta bay trata e caso si e mande por escrito.

Segun Oduber el a bay for di eynan cu un sabor amargo, pero via su abogado e lo manda e denuncia por escrito pa PG, cu tur prueba.

“Nos lo pidi e PG unda nos por bay entrega e denuncia oral, pasobra nos no ta bay laga e asunto aki te akinan”, segun Oduber.