Lama bruto a laga partinan di Baby Beach un biaha mas bao awa

ORANJESTAD (AAN); Ni e infrastructura cu a wordo construi na Baby Beach, no a stroba e problema di semper presenta su mes ora cu lama subi tera durante labaderanan cu tabatin den fin di siman cu a pasa.

   E situacion di atmosfera instabil cu calor di den dia, tabata impulsa nubianan cu awacero y cu biento suplando di diferente direccion cu a pone lama bira bruto.

   Aunke Baby Beach tin un sorto di golfbreaker natural pa proteha e beach aki, toch lama halto a subi tera y yega te na caminda cu ta pasa eybanda.  Y manera por mira riba e potretnan aki, e lugar a keda basta inunda, incluyendo Diadomingo atardi ainda e tabata mescos.

   Conseho pa publico ta pa evita di bay landa e dianan aki, como cu coriente di lama ta hopi fuerte mes.