Lama a reclama bek tur e beach cu tin entre Tamarijn Beach Resort y Divi Divi

ORANJESTAD (AAN); E ciclo tey bek, y den fin di siman por a nota con labaderanan for di west, a produci lama bruto cu a keda azota e beachnan bunita di Aruba.

   Y un biaha mas, e area fragil di beach cu tin banda di Tamarijn Beach Resort, y tambe Divi Divi Beach Resort a confronta problema ora cu awa a subi tera y a djis ‘wipe-out’ full e zona, azotando tambe e golfbreaker dilanti Tamarijn.

   Olanan tabata fuerte y tabata pone cu ningun hende a tribi di drenta lama pa dal un baño.  Varios palapa a colapsa tambe ora cu lama a coba nan fundeshi, y por a mira par di personal di mantenimento hopi ocupa pa lastra esakinan hala un banda pa evita cu lama bay cu nan tambe.

   Atmosfera instabil combina cu calentamento di den dia, a produci awacero cu tempo aki cu a combina cu marea halto pa inunda costa rond di e isla.