ORANJESTAD (AAN): E siman aki, WEB Aruba NV a anuncia cu nan laboratorio ta sigui expande su experticio cu e logro di un acreditacion ISO 17025:2017.
Pa ta acredita ta nifica cu nos empleadonan, institutonan, y otro interesadonan por confia cu nos ta mas cu capas pa eherce nos trabao primordial; pa entrega awa di bebe di calidad halto cu ta cumpli cu normanan internacional.
Pa por a cumpli cu e acreditacion e laboratorio mester a
somete na un audit externo. Esaki a sosode den luna di mei 2023 via ANSI National Accreditation Board (ANAB), e organo di acreditacion multidisciplinario mas grandi di hemisferio occidental, cu mas di 2500 organizacion acredita den casi 80 pais.
Despues di evaluacion di WEB su laboratorio, a realisa 5 ‘findings’ (incumplimentonan). En comparacion cu e averahe di 15+ findings den procesonan di acreditacion, esaki ta otro punto di orguyo pa nos laboratorio!
Aunke nos laboratorio a pasa e evaluacion cu e 5 findings, nos coleganan mester soluciona e elementonan aki pa asina obtene e certificacion. Conforme e reglanan, nos laboratorio tin 30 dia pa entrega prueba cu a soluciona e incumplimentonan.
Un acreditacion IS 17025:2017 ta duna laboratorio di WEB mas credibilidad, consistencia, imparcialidad, traceability, confiabilidad y mas competencia. Ciudadanonan y bishitantenan di Aruba ta conta cu awa di bebe di calidad; dushi y saludabel. P’esey no ta sigui cu desaroyonan y innovacionnan pa brinda un miho producto y servicio. Pabien na nos coleganan di lab cu e logro!
