ORANJESTAD (AAN): E siman aki, Julie Wever kende ta Director Tecnico y Comercial di FCCA a anuncia cu recientemente e Fundacion a apunta Jessica van Montfoort-Posner como Funcionario di Mercadeo y Comunicacion.
Julie Wever a expresa cu e operacionnan di FCCA ta bay mas leu cu simplemente brinda cas, enfatisando cu comunicacion efectivo ta esencial den
establece y mantene relacionnan fuerte cu nan cliente y comunidad. FCCA ta sigui traha ariba mehoracion di su servicio.
Ultimo nan a mehora nan producto di hipoteca cu un interes mas abou y tambe nan ta den proceso di mehoracion di nan barionan pa por brinda nan cliente mas calidad di bida. Aña pasa nan a pone e prome piedra pa inicia e proceso di “re-branding” di FCCA y e creaccion di e funcion nobo aki di Mercadeo & Comunicacion ta un paso integral den e transformacion aki. Julie: “Comunicacion ta hopi importante pa FCCA, nos kier ta mas cerca di nos comunidad.”
Despues Julie a pasa e palabra pa Jessica, kende a introduci su mes y comparti un poco mas di su experiencia amplio den Mercadeo, Comunicacion, y Public Relations. Jessica: "Despues di a ricibi mi "bachelor degree" den comunicacion na Hulanda, mi a traha na diferente companianan comercial, prome cu mi a bin back Aruba, na unda mi a traha casi nuebe aña na Royal Aruba Aloe," Jessica a splica. Pa duna algun ehemplo, El a comparti cu el a participa den varios proyecto, cual tabata dedica na e mehoramento di benta di un compania, organiza rueda di prensa y campañanan di mercadeo digital.
“Mi ta entusiasma pa uza mi experiencia pa fortalece e imagen di FCCA riba mercado y informa pueblo di e diferente servicionan cu e compania ta ofrece. Mi ta hopi honra pa por forma parti di e team aki. FCCA ta mas cu un compania di cas, e ta un organizacion cu ta yuda fortalece e bienestar di nos comunidad y nos pais door di su proposito pa ofrece cada persona cu tin mester di un cas, un hogar. Mi ta orguyoso pa forma parti di e mision aki," Jessica a remarca.
Cu Jessica van Montfoort-Posner liderando e strategia di comunicacion di FCCA, e organizacion ta cuminsa un capitulo nobo. Su experticio ta spera pa mehora presencia di FCCA no solamente como un proveedor di cas y servicionan financiero, pero tambe como un pilar vital den nos comunidad.
FCCA, un fundacion estableci na 1979, ta ofrece servicionan financiero y di "real estate," manera financiamento hipotecario, benta di tereno y huur di propiedad. E mision di e fundacion ta pa desaroya y construi viviendanan accesibel, eficiente, y duradero, pa atende cu e necesidad pa casnan social den nos comunidad. Ademas, e compania ta dedica na crea barionan cu un ambiente positivo y sano, promoviendo e bienestar di su habitantenan.
