Prome di Mei 2023 den cuadro di sucesonan mundial importante
ORANJESTAD (AAN)- Aruba cu inicio di otro siman, lo celebra uno di e Dianan di Obrero mas importante den su historia.
Ora papia di Dia di Obrero ta papia di e trabao cu cada miembro di e comunidad ta ehecuta, pa hunto por duna contenido na e palabra “comunidad” cu mester di bon funcionamento di tur sector.
Hopi bez e palabra “labor” ta worde interpreta como algo cu ta pertenece solamente na e sector sindical, cu como gremio ta representa trahadornan.
Trabao, sinembargo, den e sistema di Monarquia Constitucional, no ta limita su mes na rango ni sector, pero ta papia di e base cu ta determina un pais democratico.
Tin un tarea special pa cada ciudadano y miembro di comunidad den e sistema democratico, cu ta depende di e calidad di trabao cu cada persona ta worde permiti di presta pa asina duna su parti na bienestar di e pais.
Hunto cu mundo henter, Aruba mester buca solucionnan basico pa e bienestar central di hende, cu ta bay perdi sigur den e loke a pasa na Ukraine, cu ta bolbe duna prueba con hende inocente mester muri pa a asina regimennan dictatorial manera comunismo, ta trapa riba bida di hende y ta usa trabao di e miembronan di comunidad pa nan ocupa puestonan halto na e pais.
Generalmente Dia di Obrero ta duna ocasion pa comunistanan y hopi cu ta sconde tras di e palabra socialismo, crea imagennan robez cerca miembronan di comunidad, cu mester produci placa pa nan grupito bira poderoso y aplasta derechonan di e hende.
Awe den e Guera di Ukraine, e trahador y su famia ta worde mata pa lidernan di Rusia y nan grupito, probecha di tur trabao di e trahador.
Rusia kier bira Ukraine como propiedad pa Putin por trapa riba mas hende, cu mester muri si e exigi nan pa muri y nunca por opone nan mes contra loke ta destrui nan cu ta e sistema comunista.
Na 2023 tur hende cu ta gana nan pan di cada dia di trabao, cu na Aruba ta practicamente tur Arubiano cu como trahador, comerciante of parti di e sector publico gubernamental ta haya un entrada, mester prepara nan mes pa mas problema cu mester enfrenta den un futuro hopi dificil, manera e cambio di clima cu ta exigi cambio den sectornan importante di trabao.
Con ta sigui cu e agricultornan? Con sigui cu fabricanan y companianan cu mester adapta nan mes na reglanan nobo pa asina scapa mundo di e efectonan peligroso di cambio di clima?
Mundo a alcanza un punto sumamente importante den su historia y mester uza Dia di Trabao como e momento pa cu ta duna contenido na e palabra “trabao”, cu mundo mester pa funciona.
E deseo pa progreso sano di un comunidad mester ta e inspiracion principal pa celebra Dia Prome di Mei 2023, cu ta invita pa habri un camina nobo pa futuro, pa generacionnan cu ta bini y mester di e esfuerzonan di awe pa por entrega generacionnan di futuro e oportunidad pa nan trabao crea nan felicidad.
DIARIO awe ta felicita e Pueblo trahador di Aruba, cu ta e factor principal cu Aruba a skirbi e historia cu el a skirbi y a bira cas pa nacionnan pa grandi.
Na mes momento nos ta confirma nos compromiso cu Aruba, pa hunto como obrero confronta tur reto.
Dios bendiciona Aruba, cu a sembra y ta sigui sembra cu Fe den Todopoderoso, Kende na creaccion a entrega na hende e bienestar di mundo a base di trabao como instrumento mas noble cu ta existi!
