KvK cu encuesta online pa conoce e 'feedback' di su clientenan tocante scarcedad di trahado

Sue-Ellen de Freitas Sousa, Hefe Support Informacion Empresarial:

• Dirigi principalmente na esnan dunado di trabao 

ORANJESTAD (AAN) Diaranzon mainta, Camara di Comercio y Industria (KvK), a yama un conferencia di prensa, den cual a hiba palabra Sue-Ellen de Freitas Sousa, Hefe di Support di Informacion Empresarial, y Martijn Balkestein, director di KvK.

   Sue-Ellen a comenta cu nan kier a comparti informacion y, primordialmente, e tema di scarcedad di empleado cu ta un tema cu ultimamente ta bin dilanti den varios ocasion.

“Pa un tempo caba e ta un punto di atencion y tambe ultimamente nos ta sigui diferente noticia cu ta wordo duna riba e topico aki, cu ta afecta companianan y nan productividad. Companianan ta indica cu tin dificultad pa yena e vacaturenan, pues tin varios factor cu ta crea un impacto riba e problema aki”, Sue-Ellen a señala.

El a agrega cu nan ta conciente cu tin mas factor cu ta contribui na loke ta scarcedad riba e sector laboral di Aruba, y KvK conhuntamente cu stakeholders, den e caso aki specificamente AHATA, ATIA y CUA, y KvK logicamente, ta reuniendo pa duna prioridad na e topico aki.

“Recientemente, a reuni cu Minister di Labor unda cu a discuti riba e tema aki, y a caba tambe di duna cierto recomendacionnan na e Minister concerni. E conexion cu, naturalmente, ta haci cu e stakeholders tin mas peso pa por atende cu e tema aki.

A base di esaki KvK a tuma e iniciativa di haci un encuesta bao di nos clientenan, nos comerciantenan, pa wak si nos por haya sa mas di nan feed back pa wak kico précis ta nan issue, locual nan ta bibando realmente, dirigi particularmente na e dunador di trabao y cu esaki nos ta desea di haci un analisis di e problema di e ‘labor shortage’ (escasez di trahado) na Aruba. E survey online tin algun tempo caba cu e ta disponible riba nos website, y na e momentonan aki tin 340 persona (responders) cu a completa esaki. E cantidad aki no ta malo. Pa cuminza nos por traha cu ne, nos sa cu encuesta no ta e metodo di mas preferi, pero nos ta gradici esnan cu te awo a completa esaki, y a duna un tiki di nan tempo y esfuerzo pa por yuda nos cu e informacion”, Sue-Ellen de Freitas Sousa a indica.