Kustwacht cu varios conseho pa e dianan rond di Semana Santa

ORANJESTAD (AAN):  DIARIO a entrevista Louis Kirindongo,  Hefe de operacion di Kustwacht di Aruba,

relaciona cu e dianan di Semana Santa y e dianan despues, unda cu tin varios hende ta campa y ta riba boto riba laman.

Segun Kirindongo, semper durante e tempo aki tin masha hopi hende mes riba beach y riba laman, hopi mas cu normal y pesey Kustwacht su conseho ta dirigi riba seguridad.

“Nos ta enfoca riba seguridad di e boto, di e capitan di e boto y di esnan cu ta bira e boto”, segun Kirindongo.

El a sigui bisa cu algo cu por ta peligroso ta ora cu un boto cu por wanta por ehempel 8 persona, tin 10 of mas riba dje.

“Otro cos tambe cu nos ta mira ta hende cu ta core boto bao di influencia di alcohol y esey por ta peligroso pa hendenan cu ta riba e boto y ta depende riba bo”.

Tambe ta asina cu tin hende cu tin hopi tempo sin keur nan boto of nunca a haci esaki y nan ta tuma chens pa subi laman.

Esey ta pone cu por ehempel nan por haya problema cu e motor y Kustwacht tin cu sali y duna un man, segun Kirindongo.

El a splica cu bastante frecuentemente Kustwacht ta wordo confronta cu e tipo di problemanan aki.

Pesey tambe nan lo tene diferente accion riba laman, dirigi riba e parti di seguridad.

Kirindongo pesey ta haci un yamada na tur hende cu subi boto, haci esaki cu tur medida di seguridad, incluyendo zwemvest etc.

Esey ta yuda pa ora cu algo serio pasa cu e boto, e hendenan cu tabata riba e boto por keda drief wardando riba e ayudo.

Tambe ta importante pa bo tin un telefon cu bo y wak pa e ta carga y den un estuche, segun Kirindongo