ORANJESTAD (AAN): El a bira un costumber na Aruba! Ora cu prijs di productonan ta subi, mesora hende ta gusta apunta dede y tira culpa riba otro.
Nan ta grita cu “no tin control di prijs”. Otro ta grita cu Supermarket ta ladron. Otro ta bisa cu Agencia ta hortando hende.
Semper tin hende cu ta gusta tira culpa riba otro, pero casi no kier sinta studia y analisa di con prijs ta subiendo.
Y lo peor, ta cu no tin hende cu ta busca forma pa sinta hunto y trata na yega na un solucion pa purba domina prijsnan cu ta subiendo sin fin.
Esey ta loke Hubert Dirks di e agencia Compra NV a bisa den un entrevista. E ta haya cu ta hopi util pa ora cosnan asina cuminza socede, pa tur esnan envolvi trata na cera cabez pa mira con por yega na un solucion pa asina yuda henter comunidad, brainstorm riba otro posibilidad, y haci mas intento pa purba suavisa e asunto.
Dirks a bisa cu bo por hasta mira esaki for di cierto angulo! Mas caro cu productonan bira, esey nifica cu esun cu ta bay gana mas hopi ta Gobierno! Esey ta pasobra e tax di BBO ta riba e prijs. Fuera di esey e Impuesto di Importacion ta riba e prijs.
“Pues mas caro cu cos bira, ta un instancia ta hayando mas entrada,” Dirks a indica. E ta opina cu Gobierno por haci uso di e entrada extra ey pa busca forma pa subsidia otro sectornan pa asina suavisa e asunto. Esey ta djis un sugerencia di dje.
Reunion estilo cumbre: Si e importacion di 100 miyon Florin, ta bira 200 miyon Florin y si bo keda cobra e mesun porcentahe di Impuesto, ta logico cu ta un instancia ta sali mas ganador cu tur den e observacion aki.
Ningun hende kier reuni pa busca un solucion, y mientras tanto danki na BBO y Invoerrechten e caha di Gobierno ta sigui yena. Pero na final di dia, esun cu ta sufri mas ta e homber chikito.
“Nos como comercio y importador, lo desea hopi pa por sinta cu Gobierno y mira con por maneha tur esaki,” Dirks a bisa. El a mustra cu lo basico lo no bay subi di e tanto ey cu hendenan na Aruba lo bay mainta cu hamber sea pa scol of pa trabao. Aunke e ta sigur cu tin un grupo aworaki cu ta pasando masha duro mes den esey aworaki.
Kizas un cumbre pa tur stakeholder lo ta bon idea, pa asina tur hende na Aruba (Gobierno, Agencia, Supermarkets, Freight Handlers, Shipping Companies) por ta riba e mesun nivel di opinion pa traha positivamente pa pueblo por haya mas probecho riba cada Florin.
Cambio den comportacion di consumidor: Dirks ta sospecha cu e aumento di prijsnan aki ta causando un ‘cambio’ den comportacion di consumidornan. El a describi esaki como un ‘shift’, y ta pensa cu kizas awendia lo no tin hopi hende local mas cu ta bishitando Restaurantnan. Pa spaar placa, nan mes ta prepara nan cuminda na cas, nan mes ta cumpra nan boter di biña, y evita di bay come afo.
Esaki ta pone cu e ora e Restaurantnan tambe ta bay sufri y perde benta, pasobra hendenan no por paga mas.
Dirks a finaliza bisando: “Pues e subida di prijs desproporcional ta malo pa nos tur!”
