ORANJESTAD (AAN) – Endrah Richardson- Gumbs, Presidente di Kiwanis Club San Nicolas, den conferencia di prensa relaciona cu “Youth Entrepreneur Summit” (YeS) a expresa cu nan ta sumamente gradici cu gobierno, pa bin cu un evento asina pa e hubentud di Aruba.
El a menciona cu Kiwanis Club San Nicolas, tin experiencia caba organizando summit pa nan hobennan, pero esaki ta na otro nivel. “Pesey nos ta gradici Gobierno cu a acerca Kiwanis San Nicolas, pa conhuntamente nos yuda acerca hobennan.
“Na Luna di April caba, nos tabata tin un youth summit tambe, cu otro topico, pero hasta den e evento aki e hobennan a indica cu esaki ta kico nan kier. Nos por a tuma nota cu hopi di nan, ya caba ta entrepreneurs. Ya caba hopi a cuminza nan mesun empresa, si ta online, digital, den diferente ramo; esaki ta e direccion cu nos hobennan ta bayendo aden. Pesey, nos ta sostene e summit aki, pa nos por yuda nos hobennan di San Nicolas y vecindario, y nos kier invita nan tambe pa bin na e ‘Youth Entrepreneur Summit’ aki”, Endrah Richardson-Gumbs a expresa.
