Kiwanis Club of Palm Beach ta lansa programa “Invest In Me”

ORANJESTAD (AAN):  Kiwanis Club of Palm Beach ta orguyoso di anuncia e lansamento oficial di su iniciativa nobo, Invest In Me,

un programa cu ta dirigi riba Educacion Financiero di nos muchanan. E programa a ser lansa riba diasabra 5 di October na Scol Basico Xander Bogaerts den presencia di educadornan, partnernan, miembronan y invitadonan.

            E programa "Invest In Me" ta diseñá pa siña muchanan e principionan basico di financiamento personal, ekipa nan cu e recursonan pa tuma desicionnan inteligente tocante di placa, spaar, presupuesto, y planificacion pa futuro y tur esaki den forma di un wega (board game). Durante e programa, e muchanan lo siña con pa pone metanan financiero, compronde e importancia di spaar, compronde e fundeshi di gana y gasta, y haya un comprondemento basico di un maneho inteligente di placa cu lo sirbi nan bon te ora nan bira adulto. 

Impacto y Outreach den e prome aña

            Den su prome aña, "Invest In Me" lo conta cu e sosten di 20 di 37 scol primario na Aruba cu a registra caba pa e programa.  Esaki ta haci cu mas di 900 mucha lo beneficia di e programa aki cu lo yuda nan den futuro pa tuma miho decisionnan financiero. E prome sesion di e programa lo cuminsa den December 2024, sigui cu un di dos sesion den e April 2025, e siman prome cu vakantie di Pasco grandi.

            “Nos ta emociona pa mira e entusiasmo di e scolnan y educardornan pa e programa 'Invest In Me',” asina Ross Brezovar a bisa, Presidente di Kiwanis Club of Palm Beach. “Educacion Financiero ta un abilidad di bida crucial, y nos meta ta pa inspira un generacion di muchanan cu ta bini cu conocemento financiero cu lo contribui positivamente na e comunidad y asina tuma e miho desicionnan durante nan bida.” 

Curiculo di e programa “Invest In Me”

            E curiculo di "Invest In Me" ta diseña pa ta interactivo, envolvimento, y apropia pa e edad di e muchanan, cu ta enfatisa riba conceptonan financiero, manera: 

Spaar y Gasta di manera Sabi: Compronde e balor di placa, sa e diferencia entre nesesidad y deseo, y siña e basico di spaar. 

            Basico di un Presupuesto: Introduci na e muchanan e concepto di presupuesto y con pa maneha un plan simpel financiero pa nan subsidio y ganashi.

            Establece Meta: Siña e importancia di establece un meta financiero y e pasonan pa logra esaki, yuda e muchanan pa desaroya un mentalidad di planificacion di largo termino y perseverancia. 

Compronde Entrada: Mustra e muchanan diferente fuente di ingreso, inclui trabou, subsidio, y oportunidadnan di negoshi, pa yuda nan compronde e concepto di gana placa. 

Yamada na Boluntarionan y Sponsornan

            E exito di e programa "Invest In Me" ta depende di e participacion activo di e comunidad. Kiwanis Club of Palm Beach ta busca boluntarionan cu pasion den educacion pa muchanan y sponsornan pa sostene e recursonan necesario di e programa y pa sigui expande na tur e 37 scol primario den e proximo aña.

            “Nos ta kere den inverti den Educacion Financiero na nos muchanan awo, nos ta inverti den e futuro lidernan di nos comunidad,” palabranan di President Ross Brezovar. “Nos ta yama un Bon Bini na tur boluntario, sponsor, y tur cu ta kere y comparti nos vision den Educacion Financiero pa nos muchanan.”