Kiwanis Club of Palm Beach cu donacion di 29.000 Florin pa sistema di Solar Panel na Neptali Henriquez Park

ORANJESTAD (AAN): Diabierna, 7 di juli 2023, durante un reunion general bon bishita, Kiwanis Club of Palm Beach a haci un donacion di 29 mil Florin den forma di un systema di panelnan solar na Neptalie Henriquez Park.

E donacion aki ta den cuadro di iniciativanan “impactante y sostenibel” cu ta un parti integral di e club su plan strategico di termino largo. 

   Riba e reportahe grafico por mira momento cu President Daniel Aguirre hunto cu e representante di B-Energy, miembronan di Neptalie Henriquez Park, y e “chair” di e comité pa asuntonan di Club House, ta firma e acuerdo pa asina por cuminsa cu e proceso di ehecucion di e proyecto di panelnan solar pa e parke. Di e forma aki Kiwanis Club of Palm Beach ta pone boso contribucion, recauda entre otro for di nos actividadnan durante e temporada di Carnaval, den accion pa yuda e muchanan den nos comunidad.

   Kiwanis  Club of Palm Beach ta kere den sostenibilidad y den un bon futuro pa nos muchanan. E contribuicion aki, ta yuda Neptalie Henriquez Park mantene su gastonan operacional abou, crea espacio financiero pa mantencion y inversion continuo, y asina garantisa existencia di e parke pa hopi aña mas.

   Kiwanis Palm Beach ta forma parti na e organizacion global “Kiwanis International” cu ta un instancia caritativo dedica na servicio na comunida cu e obhetivo principal pa haci nos mundo mihor door di cambia un comunidad pa medio di un mucha cada bes.