Kiwanis Club of Palm Beach a instala 4 miembro nobo

ORANJESTAD (AAN): Diahuebs ultimo, juli 7, 2022, Kiwanis Club of Palm Beach a celebra un anochi grandioso,

den cual a instala no menos cu cuatro (4) miembro nobo. E evento aki a tuma lugar na e mahestuoso restaurant Quinta del Carmen, cu a percura pa un cena masha dushi mes, cual e membrecia, den atendencia record, a disfruta hopi mes.

   E parti cu evidentemente a destaca durante e anochi menciona, tabata e ceremonia oficial den cual e miebronan nobo: Chris Robles, Luc Janssen, Dylan Molina y Glennrick Ridderstap, a ricibi nan pin oficial for di nan respectivo “club sponsors”.

   E ceremonia, cu a worde conduci pa President Rothmar Coenraad, a worde inicia cu un video cortico cu a ilustra kico ta e esencia di Kiwanis. E video alavez, tabata un recordatorio pa e miembronan existente, ya cu e miembronan nobo recientemente a haya un anochi di orientacion den cual nan a ricibi informacion valioso di Kiwanis International, incluyendo kico ta e espirito y naturaleza pa ta un miembro di un club di Kiwanis.

   Finalmente, a toca Primera Dama Noritza Coenraad-Perez e honor pa yama bonbini na e respectivo parehanan di e miembronan nobo: Marisol Sanchez, Elida Arteaga, Melina Rangel y Sharitsa Franken, oficialmente conoci como Kiwanettes, y alavez a entrega cada uno un presente como recuerdo di e anochi inolvidabel aki.

   Cu e instalacion menciona, Kiwanis Palm Beach ta yega sesenta (60) miembro un biaha mas. Alavez ta rehubenece e miembrecia cu induccion di cuatro (4) miembro entre edadnan di 27 y 39 aña, cual ta completamente den linea cu e maneho di un club cu miras pa futuro.

   E anochi a culmina manera semper cu e acostumbrado hermandad (”fellowship”), den cual e miembronan nobo a haya e oportunidad pa conoce nan compañeronan di club un tiki mas di cerca y den un contexto y esfera diferente e informal.

   Den nomber di President Rothmar Coenraad, e comite organizador di e anochi en question, y henter e miembrecia di Kiwanis Club of Palm Beach, ta yama e miembronan nobo un cordial bonbini y alavez ta desea nan hopi ora nan di servicio na comunidad y hermandad.