Kiwanis Club of Aruba ta celebra 60 aña di existencia

ORANJESTAD (AAN):  Dia 21 di februari ultimo e miembronan di Kiwanis Club of Aruba a celebra 60 aña di existencia na La Cabana Beach Resort & Casino.

Invitado special pa e jubileo aki tawata Gobernador di Aruba, S.E. Sr. Alfonso Boekhoudt cu a wordo ricibi cu un caluroso bon bini den e ballroom door di Presidente Tessely Koolman-Ranis y tambe Sr. Pierre Kock, F&B director di La Cabana Beach Resort & Casino, hunto cu tur miembro presente.

            Maestro di ceremonia Sr. Ebby Schwengle, dobel distinguido ex Presidente, a yama un bon bini na tur miembro presente y a elabora riba e historia di Kiwanis Club of Aruba cu a cuminsa 21 di november 1964, unda Sr. Clinton Whitfield q.e.p.d. e tempo ey como e prome Presidente a ricibi un delegacion di Canada durante e prome reunion.

            Diferente topico a ser treci dilanti e tempo ey cu e meta principal pa yuda e comunidad di Aruba, muy en particular muchanan den necesidad. Cu yen di entusiasmo Sr. Clinton Whitfield q.e.p.d. hunto cu su directiva y miembronan nobo a acepta e reto aki. Dia 21 di februari 1964 Kiwanis Club of Aruba a wordo oficialisa recibiendo e “charter” for di representantenan di Kiwanis International.

            E vision di Sr. Clint Whitfield q.e.p.d. ta algo único cu te dia di awe a keda intacto y mientras tanto a pone cu actualmente tin diferente Kiwanis Club na Aruba sea pa adulto, hobennan adulto y hobennan cu en total ta conta cu un alrededor di 300 miembro.

            Distinguido Gobernador di Kiwanis Club of Aruba, Sr. Robert Spellen, a sigui elabora riba e diferente proyectonan cu a ser ehecuta den pasado splicando con den maneranan creativo e club a recauda fondonan pa asina continuamente por a sostene e comunidad den su necesidadnan y e importancia pa sigui hasi esaki. Distinguido Vice Gobernador di Kiwanis Club of Aruba, Sr. Giantonio Muller, a elabora riba e proyecto exitoso cu e la inicia durante di su signatura na 2017, es ta e “Christmas Ornaments” cu anualmente a recaudo sumanan significante, asina aportando na un bon causo ehecuta pa Fundacion Ban Uni Man pa Cria nos muchanan.

            Den presencia di tur invitado special y tur miembro, un cheque simbolico di Awg. 15mil florin a wordo presenta na Presidente y miembro di Fundacion Ban Uni Man pa Cria nos Muchanan, Sr. Jonn Fun y Rachelle Roos cu a elabora riba e trabou importante y indescansabel cu ta wordo hasi pa asina durante oranan di scol muchanan den necesidad por ricibi un desayuno diariamente. Un causa importante cu          Kiwanis Club of Aruba ta sosteniendo pa casi 25 aña!

Un momento special tambe a presenta pa Sr. Andre Kelly, cu durante di e celebracion special aki, a ser re-instala como miembro di Kiwanis Club of Aruba, cu den pasado tabata Presidente y tambe Vice Gobernador, representando algun aña atras Kiwanis Club of Young Professionals, awor yama Kiwanis Club of Aruba Trade Leaders.

            E celebracion a wordo clausura cu un discurso bunita presenta pa Gobernador di Aruba, S.E. Sr. Alfonso Boekhoudt.

            Kiwanis Club of Aruba ta desea di gradici tur persona y tambe tur instancia cu den un of otro manera durante su 60 aña di existencia a kere y a aporta na e meta principal pa yuda e muchanan den necesidad.