Kiwanis Club of Aruba satisfecho cu nan evento di hisamento di fli

ORANJESTAD (AAN): Recientemente riba 3 diferente fecha, Kiwanis Club of Aruba a organiza un evento pa stimula muchanan sigui cu e tradicion di traha y hisa fli na Aruba.

   Esaki a tuma lugar den e weekend di Dia di Rey, esta riba Diasabra, Diadomingo, y Dialuna.  E evento mas impactante a socede Diasabra anochi ora cu cielo riba e area di Centro di Bario Playa Pabao a yena cu diferente fli grandi tur na luz, pa resplandece tur nan energia, y publico cu admiracion tabata mira nan bay halto.

   Awendia cu tin luznan LED di bateria cu ta ultra-briyante, a pone cu compara cu antes e hisamento di fli anochi a bira un espectaculo cu hendenan lo no lubida di dje.

   Como Kiwanis, nan a patrocina 30 mucha y boluntario den henter e evento, continuando nan dedicacion pa mantene e tradicion bunita di fli aki keda bibo pa futuro generacion.  Un palabra di danki na tur cu a presenta e dianan ey pa haci e evento bira un gran exito.

   E Premio di Kiwanis a bay pa e team OTF cu a keda contento cu esaki.