Kiwanis Club of Aruba a honra e mihor graduadonan di Colegio Arubano

ORANJESTAD (AAN): E tabata un anochi inolvidabel, na momento cu Kiwanis Club of Aruba a

celebra cu orguyo e di 30 evento di Clint Whitfield Outstanding Student Award, na Aruba Surfside Marina.

   E celebracion a honra e legado di e fundador di e Club, esta Clinton ‘Clint’ Whitfield, kende su vision ta sigui inspira generacionnan di lidernan hoben.  E anochi a cuminza cu un video di sorpresa, presenta pa e president di Comision Organizador y MC di anochi, Ebby Schwengle, kende a trece e espirito di Whitfield bek na bida awor cu a conmemora e di 30 aniversario di e premio cu ta carga su nomber cu orguyo.

   Esnan cu a wordo honra segun nan nivel, ta como lo siguiente.

   Ciclo Basico 1 a bay pa Eloise Niebles Diaz.  Ciclo Basico 2 a bay pa Giovanny Martinez.  Havo-3 a bay pa Aaron Espinal Vasquez.  Havo-4 a bay pa Ismari Servud.  VWO-3 a bay pa Laura Bonnevalle.  VWO-4 a bay pa Kyle de Cuba.  VWO-5 a bay pa Jerriqu Tromp.

   E mihor graduadonan di examen ta Jia Zhong pa Havo-5, y Evie van der Sloot di VWO-6.

   Un reconocemento special a bay pa Evie van der Sloot, kende a logra ricibi e premio aki pa seis aña consecutivo, cu ta un logro extraordinario cu ta refleha su dedicacion completo, perseverancia, y excelencia.

   Kiwanis Club of Aruba ta contento cu e colaboracion di Strena Creatives Aruba como patrocinador di e Legacy Awards.  Tambe ta gradici Fundacion Clinton Whitfield pa nan cooperacion y sosten continuo den tur e añanan.  Danki na tur studiante, mayornan, docentenan, mentornan, y tur cu a guia e hobennan aki den nan enseñanza.