Roy Mezas, coordinador:
ORANJESTAD (AAN) Relaciona cu e traspaso di e Programa Stimami Guiami di Kiwanis Club Palm Beach pa Fundacion Pa Nos Muchanan, e Coordinador di e Programa Roy Mezas, a sigui bisa den conferencia di prensa, cu e club a pone basta fondo cada aña. Lamentablemente Covid a stroba un tiki pa un aña y mey, pero na 2022 a sigui cu e programa y a dicidi pon’e den man di un fundacion cu ta experto riba tereno di prevencion y ta duna curso pa mucha, cual ta: “Fundacion pa Nos Muchanan.
Nos tabata tin un encuesta pa e nomber di e Programa den cual un grupo grandi a participa, y a bin riba e dos palabranan aki ‘Stimami Guiami’. Importante ta e subtitle ‘stima bo yiu, guia bo yiu’ cu ta bay pa mayornan siña tenicanan pa cria nan yiu mucho miho, na un forma mas moderno, cu tecnicanan y habilidadnan actual, compara cu ‘best practices in the world’, manera nos sa bisa; pues, no algo cu nos a inventa akinan, pero basa riba expertonan internacional tambe”, Roy Mezas a relata.
El a reitera cu Kiwanis ta hopi contento cu e proyecto aki awo ta wordo ehecuta door di Fundacion pa Nos Muchanan. Tin expertonan local den cas, y Kiwanis ta hopi contento cu despues di algo mas cu un aña e programa a wordo duna na un forma hopi exitoso. “El a bay tremendo te awo, nos a haya hopi feedback, y e bunita ta, cu ta dos generacion. Mayornan y yiu ta participa den curso, y mi mes por a presencia con e programa ta wordo duna cu ta algo hopi bunita pa wak. Y su efecto, ya cu nos ta haya hopi feedback di mayornan y cu ta gradici nos tur pa e programa aki”, Roy Mezas a remarca.
