ORANJESTAD (AAN): Aruba Airport Authority N.V. (AAA) a ricibi bishita di e miembronan di “Royal Institute of Engineers” (KIVI) Caribbean pa un presentacion y un tour.
KIVI Caribbean ta conta cu mas di 40 ingeniero na Aruba y Corsou y su meta ta pa stimula enseñansa continuo entre su miembronan.
Angeline Flemming, Director of Health, Safety and Sustainability na AAA, a ricibi e diesdos participantenan di KIVI. Flemming a papia tocante e rol importante di AAA pa e bienestar y progreso di e comunidad di Aruba.
Christine Kaarsbaan-Leo, Sustainability and Health Manager na AAA, a duna un presentacion tocante e actividadnan di Corporate Social Responsibility y e metanan y e plannan cu AAA tin pa 2023, enfocando riba e proyectonan di SDG cu tin un impacto positivo y duradero pa e comunidad di Aruba. Ademas el a elabora tambe tocante e importancia cu e certificacionnan tin pa Aeropuerto di Aruba y e rekisitonan necesario cu mester existi pa por logra e diferente nivelnan.
Raymond Croes, Mechanical Engineer na AAA, a presenta e proyectonan di AAA cu a contribui pa reduci consumo, incluyendo Building Management Systems pa monitor e sistemanan di servicio publico di AAA. Ademas Raymond a presenta e plannan y e proyectonan di AAA cu lo sigui contribui na e operacionnan di aeropuerto di un manera mas sostenibel den futuro, concentrando riba e implementacion di sistema pa aumenta eficiencia.
Rubiela Lampe-Chiquito, miembro di e hunta di KIVI Kring Caribbean, a splica e meta di KIVI mas detaya, pa crea un red y transferi conocemento na e miembronan di KIVI cu ta residencia den Caribe.
KIVI tin e meta pa logra esaki door di organisa varios actividad mensual relaciona cu e tema di ingenieria.
Den nomber di KIVI Caribbean, Rubiela Lampe-Chiquito a gradici AAA pa e oportunidad pa siña mas tocante e proyectonan di sostenibilidad y e proyecto di expansion di Gateway 2030 cu ta andando.
Tur participante a haya un recorido door di e Utility Building di aeropuerto, pa por a conoce y haya sa mas tocante con ta monitor e consumo total di aeropuerto y garantisa un operacion continuo.
