Kico por haci ora yiu di 2 pa 3 aña contesta na manera bruto?

Con bo ta haci ora bo yiu di 2 of 3 aña bisa bo na manera bruto: “No,no,no!!”, “ Mi no kier!” etc.?

E contesta y comportacion aki pa e mucha aki por ta un manera pa wak con abo lo reacciona y pa e wak kico abo lo haci. Tambe e por ta indicacion cu e ta cansa y no kier sigi bo instruccionnan mas: e ta cansa di haci loke abo kier p’e haci. Tambe e por ta un indicacion cu e kier haci cosnan su mes.
Cua cu e causa ta toch ta dificil pa bo anda cu e comportacion negativo aki.

Algun sugerencia ta:

Corda cu e comportacion aki ta un etapa den desaroyo di bo yiu
Wak su comportacion for di e punto di bista aki y lo bo por anda mas facil cu n’e.

Cambia e topico
Door di desvia su atencion bo por yud’e bira mas cooperativo y bai di acuerdo cu loke bo ta pidi e pa haci.

No laga papia bruto of comportacion bruto pasa bai sin mas
Cu su comportacion kisas bo yiu ta purba mustra bo cu e ta un persona riba su mes. Pero comportacion y papiamento bruto ta keda bruto. Ora bo reacciona riba esaki haci’e na un manera calmo door di bisa p.e. “Por fabor, no papia asina!” of  “Parce cu bo ta rabia. Tin algo cu bo kier bisa mi?” Bo yiu lo sinti un alivio grandi si e haya e oportunidad pa deshoga su mes.

Ofrece oportunidad pa scohe
Yud’e siña cu tin otro posibilidadnan pa expresa su rabia of malcontento. Gui’e pa usa frasenan manera “Mi ta rabia pasobra .....”

Wak con abo ta papia
Porta bo yiu ta sigi bo manera di papia. Mucha cu ta tende otro hende bisa hopi biaha “no!” tambe lo usa e palabra aki hopi.

Fuente di articulo: “Curbing back talk”- revista Parenting.
Pa cualquier pregunta of mas informacion tocante educacion di mucha por aserca
Fundacion Pa Nos Muchanan na Cumana 2. e-mail: This email address is being protected from spambots. You need JavaScript enabled to view it.