UNESCO tin su mensahe pa Dia Mundial di Teatro 2025:
ORANJESTAD (AAN)—Den entrevista cu DIARIO, John Freddy Montoya, funcionario di Departamento di Cultura Aruba (DAS), a señala cu UNESCO a destina un persona di taya internacional presenta un mensahe pa mundo henter les’e.
E aña aki e mensahe ta ‘cual ta e trabao di e actor pa nos combati dañonan contra nos medio ambiente, e mal uso di tecnologia, cual ta bay ta e trabao como actor.
“E reflexion aki, di e Dia Mundial di Teatro ta trece dilanti pa spierta nos, habri nos conciencia, nos wowonan, pa nos realiza cu teatro tin un profundidad, incluso teatro ta e unico herment cu cual nos por combati guera. Teatro tin e capacidad di lanta un mucha for di depresion, di un scuridad, y un oportunidad pa tin conexion cu otro.
Trabao riba su mes di teatro ta hopi grandi: tin e aspectonan pedagogico, artistico, sin lubida e parti di produccion na unda nos ta un poco limita. Ta existi hopi fondo, berdad. Pero e proceso caotico pa nos yega na e fondonan pa realizacion di produccionnan grandi, a keda limita na un siñansa extra cu nos mester percura con e hendenan aki ta bay yega na e realizacion di construccion di un descripcion di proyecto; aunke pa nan por genera, haya e fondo, y asina aki presenta diferente vision, diferente obra”, Jon Freddy Montoya a señala.
“Locual si mi ta invita, ta pa pueblo di Aruba cu a mantene teatro, actornan, escritornan, pa nos dedica un espacio grandi, pa loke ta e escritura di Papiamento, obranan na Papiamento, duna balor na nos idioma nacional, p’asina aki nos por tin e lazo di conexion, e cercania, e contacto, pa nos por sigui educa, y tambe invitando e autornan pa nan por bin cu obranan pa mucha. Nos falta hopi obra”, John Freddy a indica.
John Freddy a argumenta cu tin hopi obra clasico pa mucha, pero di baina nan ta traduci na Papiamento, pero di e obranan local, unda nan trabao ta keda? “E trabao ta grandi, con nos ta bay acumula tur e obranan aki? Y cu e deseo pa Departamento di Cultura cu e Ministerio di Cultura, cu ta presenta e celebracion nacional di Dia Mundial di Teatro pa 21 aña consecutivo, na unda bo persona incluso ta forma parti di e evento aki, cu un mega obra cu yama ‘Nuebe Luna’ cu e keda memorable den nos pueblo”, John Freddy a expresa.
