Magaly Brito, Secretario General SEPPA:
“Nan tin cu traha 16 ora locual ta inhumano
ORANJESTAD (AAN)—DIARIO a entrevista señora Magaly Brito, Secretario General di SEPPA (Sindicato di Empleadonan Publico y Priva), den cual el a cuminza pa bisa cu servicionan publico di calidad ta un posicion cu SEPPA a hiba, cerca tur gobierno, y no ta diferente na e momento aki, cu e formadornan.
“Caminda nos ta enfatiza pa duna un bon servicio, na nos comunidad y, naturalmente, pa e ta accesible tambe. Pasobra, bo tin un servicio aki na Playa, pero e ora ey bo ta hopi leu pa esnan cu, por ehempel, esnan cu ta di San Nicolas cu no tin posibilidad di yega facilmente na Playa, etc. Y esey ta haci cu bo por tin un servicio di calidad, pero e no ta accesibel. E enfasis ey nos ta hacie tur momento” Brito a señala.
El a agrega cu aworaki SEPPA sa tambe e limitacion cu tin di personal den e aparato publico, y na mesun momento tin e gritonan aki aya, cu tin trahado di mas.
“Tin diferente departamento, KIA sigur ta un di nan, cu ta hopi grandi y tin onderbezetting hopi grandi mes (falta di personal), y mescos cu otro departamento di e parti ehecutivo, na unda mester percura pa nos reglanan wordo respeta”, Magaly Brito a señala.
Esey ta conduci cu tin diferente keho aki aya, riba e servicio cu mester wordo duna, Magaly Brito a señala. SEPPA ta haya cu mester bin mas trahado den e departamentonan ey. El a subraya cu personal di KIA mester traha 16 ora locual ta inhumano.
