KFC Aruba a lansa 'Cosecha di Coronel'

Pa sigui stimula agricultura local

ORANJESTAD (AAN): Pa KFC Aruba, comunidad ta cuminsa cu accion — y den conmemoracion cu Dia Mundial di Medio Ambiente aki - cual ta reconoci internacionalmente riba 5 di juni, e accion y conscientisacion aki ta uno pa crece cuminda den nos propio tera.

Riba fin di siman diasabra 23 di mei, hunto cu Colegio Conrado Coronel, KFC Aruba a lansa 'Cosecha di Coronel' cual t'un iniciativa di hardin comunitario diseña pa siña muchanan tocante sostenibilidad, bida saludabel, y tambe e trayecto di cuminda for di simia te riba mesa.

Mas c'un hardin di berdura
Mas cu solamente un hardin di berdura, e proyecto a transforma parti di e scol den un klas practico den aire liber unda studiantenan lo bay siña con pa planta, cuida y cosecha nan propio cosecha.  Inspira p'e legado di Coronel Sanders, e iniciativa ta enfoca riba nutricion, responsabilidad y inversion den e siguiente generacion. E proyecto a cuminsa cu restauracion y preparacion di e area di hardin existente, incluyendo reemplaso di dak di sombra agricola, renovacion di e areanan di plantacion, y creacion di un ambiente saludabel pa berduranan creci den clima di Aruba.

Tur hende a traha hunto!
Studiantenan, boluntarionan, docente y miembronan di team KFC Aruba a traha hunto pa haci limpi, reconstrui, y duna e espacio un bida nobo.

Como parti di e experiencia educativo, muchanan a cuminsa na traha cu nan simia den klas mes uzando beker recicla di KFC prome cu esakinan bay den hardin. Cosecha manera tomati chikito, concomber, pepper, rabano, bonchi largo y yambo a keda scohi pa nan capacidad di crece bon localmente y pa yuda studiantenan facilmente reconoce y cuida e plantanan.

E dia oficial di plantacion tabata un celebracion di comunidad, conscientisacion ambiental y trabou den ekipo, unda a trece hunto studiante, mayor, docente, boluntario y empleadonan di KFC pa planta berdura y siña practicanan sostenibel di hardin hunto.

Señalnan educativo rond di e hardin a yuda transforma e espacio den un experiencia di siñamento bibo pa hopi aña venidero.

Cu 'Cosecha di Coronel', KFC Aruba ta sigui su compromiso den crea impacto significativo mas leu cu e restaurant mes — plantando no solamente diferente tipo di berdura, pero tambe conocemento, responsabilidad y plantamento hunto den comunidad.