Richella Dorothal di DTI:
ORANJESTAD (AAN) – Richella Dorothal, di Departamento di Inspeccion Tecnico (DTI), den entrevista cu DIARIO a señala cu e parti mas esencial di e trabao di DTI ta e keuring di auto, cu ta otorga un di e documentonan rekeri cu mester tin den e auto como parti di cumplimento di ley.
Den cuadro di e plachinan nobo cu ta bin pa aña 2025, loke ta e keuring ta keda mescos, pues manera tur aña e personanan mester cumpli cu esaki, pa tin e keuring di nan vehiculo.
“Pa locual ta e fin di aña aki, aworaki casi nos ta drenta November-December caba, mi kier bisa tur persona cu nan keuring ta bay caduca, of cu no tin’e vigente actualmente, pa pasa cerca nos pasobra aworaki caba, e agendanan ta basta yen, pa bo tin e documentonan necesario”, Richella Dorothal a señala.
El a duna di conoce cu DTI a ripara cu KPA (polis) ta haciendo controlnan caba, y debi na esaki hopi hende ta bin haci nan afspraak pa bin keur nan auto. El a agrega cu e cantidad di autonan cu DTI ta keur pa aña ta subi y baha, y mas bien menos hende ta keur nan vehiculo y esey ta un parti grandi cu DTI ta enfrenta, y ta necesario e parti di responsabilidad di e ciudadano mes pa tin nan documentonan na orden.
“Un vez cu bo no tin esaki, polis ta para bo, bo ta haya un boet, y esaki ta mas caro cu e keuring mes. E suma pa keur bo auto ta 50 florin so, y si bo tin truck e sumanan ta diferencia, depende con grandi esaki ta”, Richella Dorothal a indica.
Aruba ta yegando na e cantidad di 91 mil auto, Richella a menciona cu e crecemento ta bin segun añanan ta pasa. Ora un persona tin un auto nobo, ta despues di tres aña e ta bay keur, despues ta sigui cada dos aña. Esnan cu ta keur tur aña ta esnan cu ta wordo uza pa transporte publico, y bedrijf autonan. Pues, el a reitera cu ta bon pa ora e keuring ta cerca di caduca, pa haci un afspraak pa keur, na tempo.
